Read Sumi Naga JOB 29 Bible Online

JOB 29 - Sumi Naga bible

JOB 29

¹Job no pa tsa pipishe puakeu itaghi pithue.

²O, wovekeu ghulokilo Alhou no ikheiheju achekeu tsalalo ino idewolu ke aye!

³Pa kuluno ikutsu shou yepe acheke, eno pa kuvu lono ino akuzu vechewu cheke.

⁴Ihe igho tsala loye Alhou sasu kuposhu keuno ikibo shou acheke.

⁵Tuchomujokulu Lhou no iphivilo acheke, eno inulino isuhupe acheke.

⁶Akichhizuno ilaghi lo qowu cheke, eno atuquno ighenguno teli lephetsu cheke.

⁷Aphu liwolo ino wukelo eno muchomiqo gholo kuho iqaniye kuto aye,

⁸apumiqono ni ithuluno tsughuvetsu che eno muchomino ithu puthu gholuve cheke.

⁹Ayehkipemino atsa pipisheno ngove che, eno a-u pesu amtsulo bepe ngove cheke.

¹⁰Akhotomi shiaghi pimu tshuyimu shimove che eno panongu mili muqapusu ngoluve cheke.

¹¹Ighili chilukemi eno ni ithulukemi kumtsuno ino mla itha keulo tiye alo anie picheke.

¹²Kughengu kumlhomi qa aghikeu ino xaphe cheke, mighimi khilau wumono aghi aye ino kuphu cheke.

¹³Ghichhe ghime lo aghikemino isheqhe cheke, eno ino chimemi mulo vepiqi tsucheke.

¹⁴Ino amikucho pepuke eno tino ihupite tsuke, ino achipiu lono xathatsu keu huye aku-uphi eno akutsu hechije keu phi toi idi ke.

¹⁵Ino anhethi kighichemi nhethi shitsu che, eno apukhu kighichemi pukhu shitsu cheke.

¹⁶Ino kumlhomi papu shi cheke, eno ino muthamithe kemino muto kelo phukide kudaju tsucheke.

¹⁷Ino kusakughami hubo kutsavetsue, eno tsupe aghikeu pano baxa lono hakholuve ke.

¹⁸Ino kumsu chekeuno, niye apusu nhu keu lono thi nani, eno asaye toi ixukushu hesamla nani picheke.

¹⁹Niye asubo lakhi kuhuno azu lau qusu wuke toi nani, eno niye asubo lokalo atsuzu qipuku keu toi nani picheke.

²⁰Ijekipiye anile anile shi, eno isuzuye pulhapuju i-u lo akithe shi anani ipi cheke.

²¹Timino itsa ininike khekulhoe. Eno iqunei shino ikukumsu inicheke.

²²Ino pivekethiu panonguye tipa shou pikupha moe, eno itsapi panongu lolo ikiqi ikulue.

²³Tsutsughu kheakeshi panonguno ikhekulho shie, eno ghixu tsutsughu kheakeshi panonguno itsa muno qhiluve cheke.

²⁴Ino ahumiyi panongu piye aye, panongu ghuthi xuipeghive cheke. Panongu lokumtshuye khilemu izupuzuve mlae.

²⁵Ino panongu laghi kichepiye, eno atomi toi panongu sapheke, Akukauno pawu ghushimi gholo achekeshi eno timino qa-mlo akemi lokughunotsu keshi niye panongu gholo xu acheke.