Read Sumi Naga JOB 3 Bible Online

JOB 3 - Sumi Naga bible

JOB 3

¹Tipathiu Job no pa kichi xukho puzu pa punu keu tsala ghusho ghi pi:

²Ipunu tsala angusu shivepeniu, Imishi keu ji angusu shivepeniu!

⁴Tipa tsala hu akuzu shikidevepe. Alhou pelo tipa tsala khilemu kumsulu pemoniu, Akuvu pelo tipa tsala khilemu yepuvu pemoniu.

⁵Akuzu kutho eno zumoikeu tsala shivepe, khungkusuno ti khonha luvepe eno tipani tsukinhe hauve peniu.

⁶Akuzuno tipa jiyi ikhisuwuvepe, ampe gholo kihisu pemoniu, atusho gholo kihisu pemoniu.

⁷Anuha eno alokivi kuhakeu ji shivepe,

⁸Shiximi khunoqono Leviathan[1] haputhulu chenikeno panoqo pelo tipau tsala ghushove peniu.

⁹Tsukutho yepu pelo ti yepuvu pemo niu, ti tsukutho laju akeu ithulu pemoniu.

¹⁰Kushiye iza tita lono ikhatha luve mo puzu ipelo amlo ghime eno shiluksa sholu pe kya?

¹¹Kushiye niye akithi shi-ghi punuvemo kya? Momu punuqhi kemtsa thive mokya?

¹²Kushiniye iza pelo alukobo lono ikhape apekya? Kushiniye li kichhi ipini apekya?

¹³Tishikeaye, kukami eno ayehkipemi khunoqono khaghi ghuloki kikuloghi shikithe chekeno nighi tipaqo gholo xuwuveno iqunei aghiveni che, ihozuveno akulho qhi aghiveni cheke.

¹⁵Momu kukami laghami shuna tsandi no aki chhitoi shi pighi chekemi gholo zuhuve aghini cheke.

¹⁶Momu anga kughunu alalo hauveke qono akuvu ithumlano hauve ke toi niye tishivemo kya?

¹⁷Tilehiye kusakughami ghi shikimighi mae eno kulhokughomi no akulho qhiluchenie.

¹⁸Akughumi ghi kumtsa iqunei ngolu cheni, panonguye akumla pichetsukemi sutsa chilu mae.

¹⁹Kijemi ghi kitilami ghi tilehi anie tilehi aqemi ghi pa mpeu qe chemoe.

²⁰Kushiye timi pelo akuxu kughuju shi xupe kya? Kushiye akuvu pesu aghime shiakemi tsu kya?

²¹Pano ye akithi khe anamu ighi tsumoe. Akini qhope puake toi ti chhuju puhae.

²²Thive puzu qhove moke kuto panoye alokiqi kuhae.

²³Alhou no alaghi hekhavetsu eno ghanha khavetsu keghi kushiye akuvu tsu cheni kya?

²⁴Kughengu ikuqa kumlono ikhuna shiauvae, ighughano zuqo ghugha hutoi anie.

²⁵Kughengu ino musa chekeu huno iha ighivae eno ino ighu chekeu huno ishou ikughivae.

²⁶Niye iquneimla eno a-a shimlae, niye akulho qhimlae, ighime ashekha aghile kuhae.