Read Sumi Naga JOB 30 Bible Online

JOB 30 - Sumi Naga bible

JOB 30

¹Ikemu itehiye ito tiqhelimi qo no ijunu auvea. Panongu papuqo ye iwu bheri khechekeu atsuqo gholomu ngopemo kepu shi ino mithi chekehu!

²Panonguye aphilo akuagha kuha vekemi timiqo ke, panongu phi au ighengu kiu kukakugha kumla mlatsuluni kya?

³Akumlho eno akhuava launo panonguno aghasalo qhaikeu kuhu minhe cheke. Aghaghi eno yengui ke a no panongu puaza ke.

⁴Asuminipho qholo vashuniye ghechu eno achhophe subo kuhu no panongu chuqupu shike!

⁵Aqoaho gholono panongu hapupove, kupkami hakelo chhu-chhushi kite keshi panongu hae.

⁶Azulaki ngo ngukakuki eno ayeghi kuchhukiqono panongu ki shi masaveke.

⁷Asuminipho gholo tughashi toi panonguno igha, apughupho qholo panonguno kuvape ngoe.

⁸Mbomuzumi nuliqo eno aje kumoke nuliqo! Panonguye ayeghi lono hehapheve ke.

⁹Itehiye panonguno ikughape atsa ale shiauvae, eno niye panongu tsabo shiauvae.

¹⁰Panonguye iju apumqhu eno ilau no putosuu ngoe, eno igilo musute pukuni keu ighu keu kuhae.

¹¹Kughengu Alhou no ikughuchove eno isunheqhive kehu panonguye izulo suchilekeu kuhavae.

¹²Iu ajeu kudauno aloji shi ikughie, panonguno ihapupoe, eno panongu no kutsakungo nikeu pesu ivekhae.

¹³Panonguno ikupo la thaluve, eno ikutsave niye pukaputsae, khunomu panongu hakha moe.

¹⁴Panonguno aliwo kughuxu lo hutoi ilau vexu iloghi, panonguno ipaiqi ishou ilu ikughie.

¹⁵Akumsapuno ishou takide pukue, iwu kikhikighi kuxu ye amlhu toi chevae, eno iwu kinikulu ye khungkusu toi chevae.

¹⁶Ike niye itehi thiveni chea; shiluksa tsala iphemono itsuqu luvae.

¹⁷Putho shive aye ighi kumtsuno suwuve eno akusuno minheqhi keu no zuhumo mitheke.

¹⁸Alhou no iphikuzu ku-o kukha lono tsuqu luveno suchighi vetsuno jusavae.

¹⁹Pano anibalo ikughape veqhi, eno niye ayevu eno ayeghi mukhu hutoivae.

²⁰Alhou o, ino olau ighamuku ighie, ikemu nono iputsamoe eno ino ozulo puthugho pimu nono ijukutomoe.

²¹Nono ayikusa shi ipeithae, eno okuka kumto kumtsu pesu ishikimighie.

²²Nono amlhulo ikhapepuku eno tipau pelo ixapupe, pasapagha no ikishi puhae.

²³Kughengu ino ithi ani, nono akithi lo isawo suniye anike, kuxumi ghengu kutope puakeu-a lo.

²⁴Tishimu, yimu-ilochekeu huno pa u chhopuwojumo nikesha?

²⁵Shilusa akemi sasu ino qah-mlo chemo kesha? Momu pukhupileveno aghikemi huye kuphulepi ighamoni kesha?

²⁶Ino akivi laju akelauye alhoksa ighie eno akuvu khe akelauye akuzu ighie.

²⁷Iwu kighinoli muqhomzai puzu iqunei mlae, ghichheghime tsalano ilakhape auvae.

²⁸Alokughuno kuhano mlo-qah iqhoiqi, akukuholo puthughono ikuphuni malaye ighamukue.

²⁹Niye atine thikuzuu shiauvae, eno aqhaqho sasu aposhu-u shiauvae.

³⁰Iyikoye tsubuyivae, eno ighiye shukuthuyi kelauno ipitiqhie.

³¹Iwu akighi lebo ghi muloqah auvae, eno iwu ayihu lebono qahkemi sutsa ilhouvae.