Read Sumi Naga JOB 31 Bible Online

JOB 31 - Sumi Naga bible

JOB 31

¹Ino inhethi pelo ashoqhi shiveape, kushiye niye ilimi shou jupuku ani kya?

²Kughengu Alhou no kunguu no isala kiu kuto ani kya? eno Tuchomujokulu no kunguu kiu mheghi isala ani kya?

³Lhoksakughami kutsaveni keu ke kumo kesha? eno akipimi kumlami pukhupile sholu pemo nikesha?

⁴Alhou ampino ila kumtsu ithulu ani, eno ipukhune sukiqhe kumtsu hesa anike kumo kesha?

⁵Ino akumou akukuhau shi cheghi aye, momu ipukhuno pishikiqhilo kakashi wupuaghi aye,

⁶Alhou pelo amikucho akimighipu lono ipeqheju peni, eno papelo iw kikhikighi kuxu ithilu peniu.

⁷Ipukhune suqhepimi puaghi aye, eno imlo pelo inhethi papewu puaghi aye, momu axine iu lo dapesu aghi aye;

⁸Kutami pelo ino xusukeu chuve peniu, eno ilulo ipeghikeu abo lono nhuve peniu.

⁹Kutami nipu pelo imlo musu sawuve puaghi aye, momu iki sughuwu hukikha philo ijeh pesu itshu puaghi aye;

¹⁰Inipu pelo kutami chuqupu kuto tsuwuve peniu, eno kutami pelo li sasu zuauve peniu.

¹¹Kughengu tishi puaghi keuye kuquve keu ae eno kughakuthami zulo pithive kuzupu kipimie.

¹²Kughengu tiye kutsakungo[22] keu ami kughuqu ake, eno ixabo kumtsu nhuvetsuni ake.

¹³Iqepumi eno iqelimi no ishou kiuala aghi puzu ilau peighi kelo ino panongu vehupu mithivetsu puaghi aye;

¹⁴Alhou no ipeghi kelo niye kishini kya? Eno pano kughathaniye ighi kelo kiu khochileni kya?

¹⁵Iza polo ilhokeu huno panongu ghi lhoke kumo kesha? Eno pano atita lono ningu kughulho ke kumo kesha?

¹⁶Ino kumlhomi pulou suchileluve aghi aye, momu chimemi pelo amlo kichi puha ghi xuvepe aghi aye;

¹⁷Momu ichuqupu ilikhino chuve puzu, mighimi kumzupe puaghi aye;

¹⁸Kughengu ilhothe lono paye igholo apu toi saputhue, eno iza polo aphi lono ino li la piyeke,

¹⁹Khuala aphimini kuhakeu ghengu lono hauveniye aghi keu ithulu puaghi aye, momu kumlhomino ukepu kuhano aghi keu ithulu puaghi aye;

²⁰Pano isheqhe mula kepu shi aghi aye, eno iwu bheri mhino shikeu phiminino pa lupulumlave no aghi aye;

²¹Kughakutha-a lo timino igholo su nani keke ipi puzu i-u pesu mighimi shou chhopuku puaghi aye;

²²Ibighi pelo inaghu lono ipoiqive peniu, eno i-u ghuchughi pelo ibi lono ipowuve peniu.

²³Kughengu Alhou no ghimeqhini keu musake, eno paye chuqumughai kehu niye hipaqo lakhimu shimusae.

²⁴Ino shuna pesu iwu lajupu shipuaghi aye, momu aghile shuna vilo, “nono ikupukhu ke” ipi puaghi aye;

²⁵Ikuakini kutomo kehu eno i-u lo kutomo kikelu kehu akijivilo aghi aye;

²⁶Tsukinhe no vuqai yepuvu aghikeu momu aqhino qhivutsuniyi itha cheghi keu ithulu puzu

²⁷tuqhouno imlo zuluve aghipe eno i-u no ikichi kujupesu tipaqo gihu puaghi aye;

²⁸Highi kughakuthami zulo aghime tsukepu kipimie, kughengu tiye kunguu akeu Lhou milive ake.

²⁹Imithichekemi no shilusave aghikeu ilovi puaghi aye, momu shiluksa pashou ighikelo ino ilokiqi shipuaghi aye;

³⁰Ikichi pesu pa shou ghushobekeu lono axine shipuaghimo namu;

³¹Ikilo kuamino ishi pi puaghimo aye; “Pa shi-akha no aghapiqi tsumokeu khuu ani kya?”

³²Inami pelo khalau zupe chemoe, ikemu izukichemi ikilo khaqhisu cheni.

³³Adam toyi ino ixine kusu puaghi aye, eno ikipimi ipuqholo kusu-ghi aghi aye;

³⁴Niye timi aqo kitikhi musa nicheke, momu abolomino ithakeuno ishi thughuyi veni cheke, tishikehu, khalau ipemono inaqhoiveni cheke.

³⁵O, khualanomu itsa ta initsu anikeo mokya? Tuchomujokulu Lhou pelo ishou kiu pikepu ani kela pijulo, eno isasu kumjo akeuno kakulo ingku keu yepe puaghino itsu pelo.

³⁶Kuchouno tipau ibighi lono xapuno kumtsu pelo ithulu penike, eno ikutsu kuqho shighi pepuni ke.

³⁷Alhou vilo ino kiu shicheni kela kumtsu lheni ke; Pa vilo ipukhune sukiqhe kumtsu lhenike, kijemi toi pa zulo pewuni ke.

³⁸Iyeghino itha-ghi ishou igha puaghi aye, momu tile ayikuqono kumtsa qah aghi aye;

³⁹Tile lhoipeghi keu ame tsumono chu puaghi aye, momu tipau mpiu pelo pa kuxu pukahve pe aghi aye;

⁴⁰Athi zuqhu asahu ipeghi pelo, eno ashothi zuqhu alupi ipeghi pelo. Job tsa kishekhavae.