Read Sumi Naga JOB 32 Bible Online

JOB 32 - Sumi Naga bible

JOB 32

¹Ikehu timi pano kuthuye Job khochilemono ngove, kughengu Job no pa likhi paye amikucho pi piauveke.

²Tile Elihu, Barakel nu Buzi noghami, Ram nobolomi ye Job shou axu ideve, kughengu Job no Alhou nguno pano amikuchou shiauve kehu.

³Elihu no ashou pano kuthu shou ghi axu ideve, kughengu panonguno Job khochile kulupu ala phumlave keu lono Alhou no akumou shipakeu toive peke.[23]

⁴Ike Job no atsa pitamoke kuto Elihu ye khe ake, kughengu panongu gholo pano ayitiu kehu.

⁵Ikemu timi pano kuthu kichi lono khokichilepu ipeghi move keu Elihu no ithuluveno pa xu ideveno

⁶pithu: Elihu Niye lhothemi eno nonguye muchomike, ikehu ikighithi nongu vilo lhenike niye musa ichiake.

⁷Ino ilikhi ivilo pi, “kichimi phesuni, eno ampe kushuwa xuighivekemi pelo alokutsu shika peni!”

⁸Ikemu timi lolo anguagha akeu, eno Tuchomujokulu Lhou tuthuno panongu pelo ithi tsaqui lu cheni peke.

⁹Muchomi shiwuvekeu lono timi ye alotsu chenike kumoe, momu muchomi shiveaye achipiu kugha thakulu ithi tsaqui chenike kumoe.

¹⁰Tighenguno ino pinike inijutsulo, nighi ikighithi nongu vilo lhejunie.

¹¹Nonguno kiu pikepukela phuakeu eno nongu wu alokutsu tsapi ikini kughope ini ake.

¹²Niye nongu jukuto ake, ikemu ningu khunomu Job no pikeu ghechile mlavae, momu khunomu pa tsapi khochilemlavae.

¹³Nongu no khilehi ishi pilunosa ne: “Ninguno alokutsu phuluvae. Alhou no kumoaye timiye pa haqhilu mae.”

¹⁴Paye nongu putsa akethono iputsa ake kumoe, ikeke niye nongu tsapi paphi pesu pa khochilemoe.

¹⁵Panonguye bamsae, Job, panonguye kiumu khochilemovae panonguye pikepu havae.

¹⁶Panonguno kiumu pikepu kuhave eno kiumu khochilemono inaqhoi puthugho auveke ghenguno niye ishi khe ani kesha?

¹⁷Nighi isala khochileni, eno ikukumsu nongu vilo pinie, nighi ikighithi lhe juniae.

¹⁸Kughengu pikepu ilolo chhitoi anie eno ilolo anguagha no ihakilhe anie.

¹⁹Julo, ipoye ajino mlaghubeyi puzu kiu lono vezuli ipemono ake hutoi anie, eno ayiko hughilo aji kithe mpaveni ye ake hutoi anie.

²⁰Iloputsulu pe kepushi ipelo pipelo, ino khochileni ke ikichi xukho pelo.

²¹Niye khuu gimu jumoke eno akumo akukuhau shighi timi sheqhekeu shi chemoe.

²²Kughengu akumo akukuhau shi timi sheqhe keu niye mthae; ino tishiaye ilho keuno itheno ni pewuve nanike.