Read Sumi Naga JOB 33 Bible Online

JOB 33 - Sumi Naga bible

JOB 33

¹Tighenguno itsapi inujutsunima, Job, itsa kumtsu inijukuto tsulo.

²Julepi, ikichi xukhovae eno imlino itaha lono pi anie.

³Itsapi ye imlo muzuchoi kehuke eno ikichino mutsumishei keu pichenike.

⁴Alhou nguaghano ilhoke eno Tuchomujokulu Lhou tuthuno ipuxuke.

⁵Nono tokulupu aye ikhochilejulo, otsapi izulo kithikiyi pesu ghojulo.

⁶Julepi, nikujo kinikujo Alhou zulo aphiphie, nighi anichepono lhopheke.

⁷Julo, imsakeuno oshikichi pekepu kumoe, momu ilauno tsadaighi keulo okichimama mo nanike.

⁸Tishimu nono ikua lono piqhivae, eno otsapi hitoi ino chiluvae:

⁹“Niye akuqu kuhae eno mithemithei anie, niye kiumu shipuamoe, eno niye pimi puamoe.

¹⁰Julo, Alhou no ikipimi shitsuni aye akupuna vesu anie, ikughape pa ghumi shivetsu anie.

¹¹Pano ipukhu ayikichhe pesu tsugha, eno ilaghi kumtsu kheauve ke.”

¹²Ikemu, le hileno noye achipi kumoe, Job, ino pi ani; kughengu Alhouye timi nguno akijeue.

¹³Tishikenoku, noye pa sasu muto ani kya? Kughengu khunomu patsa ghechile mlae.

¹⁴Kughengu Alhou no ghuthu lakhi kini kutolo pianamu timino hi jupili ithilu chemoe:

¹⁵Asamouno, putholo zuxotumo lono, kughou timino zuchei ake lono, azualo nhizuchei ake lono

¹⁶Alhou no timi kini xukhotsu cheni, eno pano kutughu keulo panongu ye thughuyive cheni.

¹⁷Alhou no putsa keuye timi pelo pano lhoksa kumla lono ideghive penike, eno pano pelo qhezamove peniyeke.

¹⁸Pa ngulho aqoh lono xaphe eno pa kuxu azuta zulono susholupe cheni.

¹⁹Alhou no kusukini pesu, eno paghi anhulo tamono pitipuzaqhi keu pesu timi shikumzu cheni.

²⁰Ikehu paye pa chuqupu junishimoe, eno achuqupuno aghile shi anamu minemoe.

²¹Pa shipiti tsapuhave kehu ti ithumla no chekehu pushulei ipeghiwu khave.

²²Ikehu pa kuxu ye kithila[24] kupunuve, eno pa kuxuye akithi ghinimi kupunuvae.

²³Tsala pa ghenguno Alhou wu kungumi qhethonheqo dolo milakhi no alacheu shi aghi puzu, kiuno achipiu keno timi vilo lhetsukulupu shi aye;

²⁴Eno pano kimiye kehu: “Kithimi yeghilo iqiniye akeu lono pa kuqhophevelo pa ghenguno thave lovekepu ino pechenike,” ishi pi aye;

²⁵Timi tipau phi ashi ye apumi nguno akumtou shive cheni, eno pa lhothe tsala lo paphishi woluve cheni.

²⁶Pano Alhou qhuiniju kelo pano pa kimiye cheni, pano alokivishi Alhou gi ithulu cheni. Alhou no pa lau pa mikucho saide ghitsu cheni.

²⁷Pano aqo gholo ishi pi nani; “Niye axine shiveke, eno akumzu pesu akughuho shivetsu ake, tiye ila heshekepu shimlae.

²⁸Kithila[25] lo wuveniye cheke lono pa no ixachile phelue, eno ikuxu ye akuvu ithulupe anie.”

²⁹Julepi, Alhou no anguno anguno hipaqo kumtsu timi lau mulatsu achenike.

³⁰Tiye kithila[26] lono timi saideghini ke eno kuxumi kuvu lono alovilu peni kehuke.

³¹Job, ino piakeu tsaqui inilo, ino pinike iqunei shilo.

³²Nono atsapi pu aghiaye ikhochilejulo, pijulo, kughengu noye achipishi anie pini keuno imlokiqie.

³³Nono pikepu kuha aye iqunei shino itsa inilo, tishianguno ino alokutsu oshikani ke.