Read Sumi Naga JOB 34 Bible Online

JOB 34 - Sumi Naga bible

JOB 34

¹Nongu alokutsumiqo, itsapi initsulo, puju shijuve no ithive kemiqo, itsa chilutsulo.

³Kughengu ataha no achuqupu miche ke toi akinino atsapi kisheju chenie.

⁴Ninguno kughathakulu thaqhu kisheluvenie! Ningu dolono kiuno akivi kela ithiluvenie!

⁵Kughengu Job no pikeu no, “Niye achipie, eno Alhou no iwu kugha kutha pewuvetsuae;

⁶Niye ichipiu loghi kishi mikiveni kya? Niye kuqu puamo kemu ighuza vimla kepu shivae.”

⁷Job toi kemi khu-u ani kya? Paye tughuthi akeshi Alhou thaigha ke.

⁸Paye axine kumlami loji gholo cheche nishike, eno lhoksa kughami sasu iqhoiqi nishi ke.

⁹Kughengu pano ishi pike, “Alhou pulou shikeu lono timiye kiumu ala shiluni chemoe.”

¹⁰Tighenguno nongu amlo kutsumi, itsa chilulo! Alhou ye khilemu alhoksa kumoe, Tuchomujokuluu ye khilemu kuquni chemoe!

¹¹Kughengu timi lakhi kumla qhemi Alhou no tsuchile cheni, eno pututa shelo pututano ithulu chenipe.

¹²Kuchokuchono Alhou ye alhoksa shichemoe eno Tuchomujokuluu ye achipiu tuchighivemoe.

¹³Khuno ayeghi jukutonikeu pa piche beju akya? Momu khuno ayeghiqha pe ani kya?

¹⁴Alhou no timi shou kumsupukuju aye, pano atuthu ngo angulho hekutsuluve aye!

¹⁵Lhoxu kumtsu qhai thive nani eno timiye itaghi ayeghi mukhu shive nani.

¹⁶Itaghi nono kumsukulu aghi aye hi inilo, itsapi chilu tsulo.

¹⁷Alhou no achipiu mithicheni aye kishi ayeh peni kya? Momu shishe amikuchou vilo noye alhoksaue pi pivetsu nikesha?

¹⁸Alhou no akukau vilo, “Nono lhoksakugha kena!” momu kijemi vilo. “Nonguno vimo chenikena!” ipilu chenie.

¹⁹Paye kijemi gi juve chemo, momu kumlhomi nguno alau kinimi kumsulu chenike kumoe, kughengu Panongu kumtsu pano lhoke.

²⁰Paikhavi lono eno zubumuta lono ghi panongu ye thive cheni, timino aghachho shi-ano cheve cheni, pano shou a-u bemo namu akumtomi hauve cheni.

²¹Kughengu pa nhethino timi pukhu sukiqhe kumtsu ju anie, eno pano timi nepa kumtsu ithulu anie.

²²Alhoksa kumlamino itshuluvekepu akuzu kutho eno zumoikeu kuhae.

²³Kughengu timino Alhou zulo atsa kughathani ke ighi kepushi Alhou ye ado kihithape puamoe.

²⁴Paye phujukide kudaju akepu kuhae, ikemu akumtomi hephopinyive chenie, eno pano zuqhulo kutami qhive cheni.

²⁵Tighenguno pano panongu kumla ithiani kehu, putho lono panongu xakulo pesu munuqhi cheni.

²⁶Timi kumtsuno ithulukepu-a lono pano lhoksakughami heqhi cheni.

²⁷Kughengu panonguno pa pape mono ilewove eno pano piyekeu laghilo amlo tsumoe.

²⁸Eno panonguno kumlhomi pelo ighamuku susu Alhou lau ighipe kehu, Alhou no kumlhomi no ighamuku akeu chilu tsue.

²⁹Ashiayeh lakhi shou na timi lakhi shou shiaghi namu, Alhou no tshuyimu shimove aye eno pa gi kusuluve aye khuuno pa pipusa momu pa ithulu kepu kya?

³⁰Ike tiye timiqo zusawuve nosakehu kuhakughami pelo ayehpe pemoniye ke.

³¹Alhou vilo hitoi pilukepue, “Ino chepimivae, niye akumou shimake.

³²Ino khikhi ithumla keno nono ishika tsulo, ino kuqu puaghi aye niye tishikithe mae.”

³³Alhou no kiu shikela nono mithi kenoku nono pulokeu shitsupeni ye huqhe ania? Tiye nono kisheluwulo, ino kumoe; Nono kiu ithi anikela pijulo.

³⁴Amlo kupumi no ivilo pitsu nani eno alokutsu shi inikemi no ivilo pinani.

³⁵“Job ye akighithi tsa pi amoe, eno patsaye aboake kuhae,”

³⁶Ashekha kutolo Job ghukeju penishi keuno ipuloue, pano axinemi paphi shi khochileke.

³⁷Kughengu pa xine shou aghekulu kumo heqabeke, eno Alhou thaigha ghi atsa kumzapu zaleke.