Read Sumi Naga JOB 36 Bible Online

JOB 36 - Sumi Naga bible

JOB 36

¹Kitila qe aghilo, kughengu Alhou sala atsa aphike ipelo ovilo pilu pelo.

³Ikighithiye aqha kutauno phusa ghinike eno ilhokeu Alhou ye amikucho kepi piyenike.

⁴Kughengu kuchouno itsapiye akimki kumo nani, akighithi lono viwotolu kemi hu osasu anie.

⁵Julo, Alhou ye akumto ke khuumu mithive chemoe, paye shishe akumtou eno asuqekithie.

⁶Paye lhoksakughami puxu chemoe, ikemu achipi lono kughathatsu keu pesu kumlhomi hiju cheni.

⁷Amikuchomi lau pa nhethi suku qumono ju achenie. Kukami toi ayeh pelu chenipe, eno pulhapuju panongu je suqhe achenipe.

⁸Panongu ayikichheno tsugha pesu, aghimeshi tshupe aghi aye;

⁹Pano panonguno kiu mlavekeno piye cheni.

¹⁰Panongu pelo pano shikithetsu akeu ini cheni pe, eno axine lono panonguno ideghive penike pitsu cheni.

¹¹Tsala panonguno Alhou gholu puzu paqe aye, pano kuxu kupuju kini kulu shi eno alokughuno shi anani.

¹²Ikemu panonguno Alhou gholumo aye, panonguye kiumu muthano kithila lo wove nani.

¹³Aqhekuzami no pa shou aloghu ide cheni, pano panongu tsughape ghimeqhi kelomu kuphulepi inikhu chemoe.

¹⁴Panonguye apumi shi aphi lono thive cheni, kuthakugha kuxu lono akuxu puwove.

¹⁵Pano aghimeshi chekemi pa ghime lono xaphelu cheni, eno shiluksa shiake lono panongu kini xukhotsu chenie.

¹⁶Owu akijiksa lono Alhou no osasu ipeghive, eno opelo shiluksa kuhano kupukunoshi keu ozulo qhitsue eno achuqupu pesu ozulo kishe kishe qhitsue.

¹⁷Ikemu itehiye lhoksa kughami shou kughatha kepu akeuno oshou ikughi anie, kughatha kepushi akeu no otsuqulu vae.

¹⁸Kutokupui puzu kulugho pelo opishive pekevilo momu kinikulu pelo osakughuzuve pekevilo.

¹⁹Ti okinino khije shi aghinamu oxakulupu kesha? eno okumto kumtsu aghinamu ti phitsuni chemoe.

²⁰Putho tsala ighipenishi kevilo, tiye timiqo puhaveni keu ghuloki shi aghiluvike.

²¹Alhoksa lau ighowuve nosake kutokupuilo, kughengu tipau ghenguno saye shiluksa olau puwuke.

²²Julo, Alhou no pa kuka pe suqhe cheni, pa toi kemi akukutsumi khuu ania?

²³Khuuno pa laghi mijetsu akya? eno khuno pa vilo, “Noye amikucho kumo shivae!” ipi kulupu kya?

²⁴Alhou no mlapuakeu lo timino pa shipilike, noye pa kumla sheqheni ke kumsululo.

²⁵Timi kumtsuno pano mlavekeu lo jupuku, ikemu putou likhino ti ithulue.

²⁶Julo Alhou ye kije eno ninguno pa ye kiutoi kije kela mutha aphie, eno pa mpe kihikha kulupu kumoe.

²⁷Pano azughi lono musu saiku puzu tsutsughu zu kighiji kughulho vetsu cheni.

²⁸Pano timi kumtsu ghenguno tsutsughu zu pelo khungkusu lono ijiqi chenipe.

²⁹Khuno khungkusu no kishi ta iqhoiqi chenikeno ithi ani kya? Momu tsutsukusu ghugha ithi ani kya?

³⁰Pano tsutsupha tipa shou puwu cheni, ikemu azughi kuthoye zuchiyi pe qhive.

³¹Hipaqo pesu pano timi loji cheni, eno kupukunoshi achuqupu panongu tsu cheni.

³²Pa u no tsutsupha tsuqulu puzu akimji shipe akeu lo chhepuku penike kite cheni.

³³Tsutsu-kusu no pasapagha chekeu asheshu tsu cheni eno pichepighi no ti chhekeu ithi cheni.