Read Sumi Naga JOB 38 Bible Online

JOB 38 - Sumi Naga bible

JOB 38

¹AMPEU no pasapagha lono Job putsae. AMPEU

²Hiye khu keno akighithi kuhano atsa kuza pesu akukutsu tsukeu pe akuzu shivetsu ani kya?

³Timi kumtomi toi itehi chighiche khapu lulo, eno ino noinijuni ke noye ivilo pitsulo.

⁴Ino ayeghiqha kughulho akelo noye khile akya? Nono thwokha ithi ani aye, ivilo pilo?

⁵Nono ithi ani aye, khuno ayeghiye khipahi shipeniepi kya? Momu khuuno tipau shou mighi kepu kighi suchhoju kya?

⁶Khuno ayeghiqha boqha choqhepe kepu tsuqupe ani kya? Momu khuno ayeghi tsukucho chhusu kya?

⁷Kugho kishino inaqhe yepuqo no alephe kumtsa, eno Alhou nuliqo kumtsuno alokivi launo euhehe shikya?

⁸Momu azughino ayeghi polono phole ipeghi kelo, khuno awolakha pesu ti khathasuve kya?

⁹Ino khungkusu pesu azughi kuzue eno akuzu kutho pesu hi hechije ke.

¹⁰Ino azughi ghenguno alughi hethape qhitsue, eno ahukikha khaveno akhadu suvetsue.

¹¹Ino tipau vilo ishi pivetsue: “Hikuto thono hinguno alau ighikevilo! Hileno nono kuchoipeghi keu ngovemasae.”

¹²Job, okuxulo khilela inaqhe vilo vu ipeghilo pi piju akesha? Momu tsukutho pelo pa-a ithi apekesha?

¹³Noye tsukutho pelo ayeghi shekha tsuqujupe, eno lhoksa kughami tipau lono sukini leveju apekesha?

¹⁴Aphimini kithikiyi kuqhuchhe pesu puakeshi tsukuvu no vezalei akuthoato piye cheni.

¹⁵Eno lhoksakughami kuvu haluve cheni, eno panongu-u kimshi lakhalu chenie.

¹⁶Noye azughi zupukilo iloju akesha? Momu noye azu kuthoku pola lo chesuwulu akya?

¹⁷Akithi kikhagho lo okhaqhisuju akesha? Momu noye akuzukutho hukikha ithulu akya?

¹⁸Ayeghiye khipahi kije kela noye ithikuthuwoju akesha? Nono hi kumtsu ithi ani aye lhejulo!

¹⁹Akuvuno khile acheni kela ala khilau kya? Momu akuzu a khile kya?

²⁰Tipau pelo khikuto wukepu kela sawulu eno tipau kilo sachile saghilu nani kesha?

²¹Nono ithi ani keniae, kughengu hipa zuwuno opunuvea keniake, eno opunu mpe kushuwa shivea keniake!

²²Noye murasu pekutsu keu khukilo iloju akesha? Momu apughu pekutsu keu khuki ithulu akesha?

²³Akijiksa ghulokilo sala eno aghukishi tsala ghenguno, ino tipaqo kutope puani ke.

²⁴Tsukinheye khipala lono ipeghi cheni, momu kipela mulhuye kishi apanagha wucheni kya?

²⁵Tsutsughu mughazu ghenguno khuno azula hepuatsu, eno pasapagha lo tsutsupha ghenguno ala ghepuatsu akya?

²⁶Timino ngochemo keu alo khuno tsughuqhi anipe kya?

²⁷Qhayikeu eno kilimghoikeu yeghi khuno chechei putsu tsu ani kya? Khuno atsaneghu pelo amzu itsu ipeghi ani pe kya?

²⁸Tsutsughuye apu ani kesha? Moaye khuno atsuzu punu kya?

²⁹Khuu polono avutsa ipeghi eno khuuno avu paza keno.

³⁰Azu shou atuno nhape ake shivepe eno azughiqha pelo achi ilhove pe kya?

³¹Noye ayenokilimi yepu[27] tsugha kumqolu nani kesha? Momu pughunosupemi[28] kutsugha kighi kuqholu nani kya?

³²Noye aqhi atusho mutsa ayepuqo laghi kichepiyelu nani kesha? Momu Ayis yepuqo[29] saphelu nani kesha?

³³Atsutsu peitha keu yeh noye ithi ani kesha? Tipau yeh ayeghilo pepimheju akesha?

³⁴Noye khungkusu vilo ighamuku pi puzu tsughuqhino ozaqhilupe nani kesha?

³⁵Momu tsutsupha mutazulepi kupuwu aye tino ighi eno ovilo, “Kiushilopi keti” ipilu nani ma?

³⁶Khuno aqholo alokutsu qhitsu kya? Momu khuno amlolo kumsukulu sutsu kya?

³⁷Chepo yeghino tsatsaive eno ayeghi muqono mutotoive kelo, khuno alokutsu lono khungkusu hakutsu saghilu nani kya?

³⁹Abongushu no pa no tuki lo itshu akelo, momu pano kughutshu-a lono miqe akelo, nono panongu chuqupu hau cheni kesha? momu panongu ti no muzuthi akeulo pulhu cheni kya?

⁴¹Abagha no muzuthi puzu yeiqho yeiqi ju puha chekelo, eno tipaqo tino Alhou vilo achuqupu tsulepi ighakelo, khuno tipaqo chuqupu kutotsu akya?