Read Sumi Naga JOB 39 Bible Online

JOB 39 - Sumi Naga bible

JOB 39

¹Achuyi no kughuloki lono piti cheni kela noye ithi anima? Momu asheno ati piti akelo sasu kipti juama?

²Panonguye aqhi khije ati pucheni keno noye hesa juama? Momu panonguno piti keu do ithi anima?

³Panonguno itsaiqino ati piti kelo, panongu ti atita-nha no kuzupe iqi ghi chenipe.

⁴Panongu ti ye choshiyi, eno aghasa lono thaive cheni, ati no wuve kethiu itaghi ideghi chemoe.

⁵Khuno agha-gadaha pelo paghoshi itsuwulu pe kya? Momu khuno pa kuqho puwu puani kya?

⁶Ino tipau pelo aghasalo ngopeke, eno amti-zu qhalo ngope ke.

⁷Paye aphughilo mubumughuyi keu junu acheni, eno akumla puloni kemi sutsa kiutoi kela chimla aphie.

⁸Naghuto no pa chuqupu kumza-a ke, eno tile atsuni kuxu aghikeu chunike phu acheni.

⁹Aviala ye okho putsu nani ma? Paye putholo omishiki lo ngo cheni ma?

¹⁰Noye aviala tshusawo alu hokide pelu nani ma? Momu opapesu oluqa qotsu pelu nani ma?

¹¹Pa kumto ye shisheno kehu pa pukhubelu nani ma? Momu okumlapu saje pa pelo mla pelu nani ke ma?

¹²Noye pa pelo ghile hupughi kepu shi pichebelu nani ma? Momu athi xapuwo ole lo leqhitsu pelu nani ma?

¹³Ostrik chishibo ye ikhonhei kehu, eno pa mhiye ili-liyi kehu,

¹⁴Pa yikhu ayeghilo ikhuqhiveno ayeghi kulu pelo tipaqo vapulu chenipe.

¹⁵Timi pukhu no momu tughashi no tipaqo nedaqodave eno nephopini yive nosakepi keu li ye kumsu mulae.

¹⁶Lino pa yikhuqoye pawu kumo toi amlo suyi keu kuhae eno yikhu kelo aghime shikeu mulo momithe ke.

¹⁷Tiye kutau lono kumono, Alhou no alokutsu li tsumo kehuke, momu ithikepu li lau kupha tsumokehue.

¹⁸Ikemu kughono lino tsutsungo shoheni keno, lino khurshi ngo tipau shou iku aghi keu thaigha chenie.

¹⁹Nono khurshi pelo akumto shilu pe kesha? Eno asa lulu itho keu pa sukuthulu pe kesha?

²⁰Tipauno huhu shi timi shikichi kelo, nono tipau pelo tulhaqu toi sukuthulu pe kesha?

²¹Alokivi launo aqalo kakashi cheni, eno pa kukakumto kumtsu pephe no aghushinanu kudau kohawu cheni.

²²Tino akumsa junue eno khilemu aghuthi sumoe, eno azuta angu zulomu shochileve moe.

²³Aleghuthibo no pa shou ghoghoshi eno angu ngo azutano kulopha phashi.

²⁴A-a shimlano ithakelau no ayeghi chipepinie, eno afuko sutsa chilu kethiu ngosumlave chenie.

²⁵Afuko ighake kumtsu lo khrukhru shicheni, eno putou no aghushi akeu tsunguluve cheni, eno kijemino asheshu ahza tsu keu chiluve cheni.

²⁶Alhaqu ye kishi yewu kepu kela olau no shikalu kesheno apeu kudau pa chishibo sukhope yeiqi cheni kya?

²⁷Aluqu no ato kuchuqu lo apusu pesu nike olauno ahza lucheni kesha?

²⁸Tino atuqu shou ngo cheni eno tile zucheni, eno natsughoto no pa liwo ke.

²⁹Pano yiqhipe chukepu shi tipau-a lono pishipuwo aqha kumtsu lo jukuto cheni.

³⁰Tipaqo ti papu no ahji musuye cheni, eno khilehi akithi kumo aghinikeno, tile aluqu tawo kumqo aghi cheni.