Read Sumi Naga JOB 40 Bible Online

JOB 40 - Sumi Naga bible

JOB 40

¹Tinguno alau ghi AMPEU no Job vilo pi,

²“Akipimi kuphuu huye Tuchomujokulu Lhou sasu muto aniaphi kesha? Alhou ghe akeu huye ti khochileju lo!”

³AMPEU, ighuzu shivea thono niye kiu okhochile kulupu ani kya? Niye Ikichi kujukhape auveniae!

⁵Ghuthu lakhi ye piveake, ikemu itehiye khochile mae, iye, ghuthu kiniamu pivae ikemu hinguno hilau ye tishimae.

⁶Tileno AMPEU no miyitsutsu lono itaghi Job putsae. AMPEU

⁷Kiptimi toi chighiche khapulo, ino ovilo inijunike lhepe ipithi lo.

⁸Noye ikughape achipikumoe pi ani kesha? Eno ikughape lhoksa kughalo suve puzu nono amikuchou shiveniye kesha?

⁹Noye Alhou-u kumto toi ani kesha? Momu noye pa toi keu sutsa kumgha ighalu nani kesha?

¹⁰Ogihu kepu eno okijivilepu pepu julo, eno jukighilepu ngo mulapuyi keu upiyeju lo.

¹¹Ologhu kighide lepesu aqhekuzami shou pukujulo eno pa haqhiveju lo.

¹²Aqhekuzami jukutoju puzu pa sunhe qhivejulo eno lhoksakughami khile aghini keno qoda vejulo.

¹³Panongu kumtsu kumtsa ayeghilo qhovejulo, eno kithimi yeghilo tsughape qhivejulo.

¹⁴Tishianguno, ipaghino akishe otsuni ke, kuchouno olikhi okumto no opelo tokulu shilue pinike.

¹⁵Behemot[30] lhoxu julepi, paghi noghi ino lhoke, amshitsu toi tino atsani chuchenike.

¹⁶Julo, pa kumtoye pa shitsulo acheni eno pa ka-aghaye papo shipalo anike.

¹⁷Pa shomhiye milishisubo toi ithae eno pa yiku shipa ye choshiyi ke.

¹⁸Pa ghiye ayihu toi mutotoike, eno pa ghuchughiye ayi khumu toike.

¹⁹Paye Alhou no mlakeu gholo atou ke. Pa lhokeu likhino pa halelu nanie.

²⁰Naghutolo khile tughashi no ili chekeu a lono pa chuqupu sughichenie.

²¹Pano asahupho qholo ihozu cheni eno anixoxo lo asalebo kusholo ngo chenie.

²²Asahupho yekukhuno pa shonha cheni, eno aghoki philo mulosubo no pa suhupe acheni.

²³Aghoki no azu ile wuve namu paye musamoe, Jordan no pa kichi kumtsu vesu ighi namu amlo laimo shimoe.

²⁴Khuuno pa nhethi kighicheve tsuno pa tshukulupu kya? Momu khuuno alichhe lono pa mekulupu kya?