Read Sumi Naga JOB 41 Bible Online

JOB 41 - Sumi Naga bible

JOB 41

¹Noye akhakumsupu yi pesu Leviathan[31] fuphelu nani kesha? Momu akichhekighi pesu pa mili tshudaqhi kulupu kya?

²Noye ayikuho pa nigipelo sutsulu nani kesha? Momu asahuyi pesu pa mukhughi jipholu nani kesha?

³Pa pelo wuluve pelopi oqhuiniju kulupu kesha? Momu mukhano oputsalu nani kya?

⁴Paye osasu pulokuqha keu shoqhi shilu puzu nono pa sawo pulhapuju ghenguno oqeu shikulupu kesha?

⁵Nono aghau pemgha ketoi pa pemghalu nani kesha? Momu pa kughape oqelimi zuvu shikulupu kya?

⁶Akhakukhami muqono pa mesaghi kulupu kesha? Lhidilhighimi no pa ghithakije lu nani kesha?

⁷Noye ayi kumugha ngupa pesu payiko lo chhesu kulupu kesha? Momu akha yi keu ngu pesu pa boghe lo chuxu kulupu kya?

⁸O-u pa shou bejulo eno nono itaghi tishijuni keu shimo nani eno kichi ghikeu hu khilemu kumsuma mo nani.

⁹Julo, amlo kuloghiu ghi adou shive nani Leviathan ithulu aphi lono iluqive nani.[32]

¹⁰Khunomu pa nguno ayikusau shi aghi puzu pa haputhu mlae. Ikeno khuno pa zulo puthugho kulupu kya?

¹¹Ipelo pa lochile peniye khuno ilakhaju akya? Atsutsu qholo akeu kumtsu iwuke.

¹²Pa phiau, ngo pa kumto ghili, eno pa koghe kughu pimono inaqhoive mlae.

¹³Khuno pa yikoza lhavetsu kulupu kya? Momu pa yikoza jixu iloghi kulupu kya?

¹⁴Khuno pa baxa sukholu nani kya? Pa huno aqha kumtsu ajo shi anie.

¹⁵Pa muqaye azuto pesu ala-ala shi mula puanie, eno atu no atozu shi puakeshi kuzukhoi anie.

¹⁶Lakhi no lakhi sasu kibikhoi kehu amlhu mu panongu dolo iloghi mlae.

¹⁷Panongu lakhi no lakhi sasu kujolha eno kimepe ani kehu, kiu nomu tipaqo sujo kututa vemlae.

¹⁸Pano hachhi shikelo akuvu phaphayi ipeghi chenie eno pa nhethi no tsukinhe ipechekelo toi saghu saghue.

¹⁹Pa kichi lono akulu kuyiqu ipeghi chenie eno ami kumpa ye ipeghi chenie.

²⁰Pa nigipe lono amchhi pho ipeghi cheni, muqho akeu li eno ami shi puku keu michhi hutoie.

²¹Pa tuthu no amiyi mi fuqhilue, eno ami kuyiqu pa kichi lono ipeghie.

²²Pa ku-o lo akumto ani kehu eno pa sasu kusholu aye kichimamave kelauno ilhe nanie.

²³Pa yiko kughulha ghi shishoi kimepe anie, tipaqo mtotoi kehu ighiqi moe.

²⁴Pa mulo ye atuqu toi mutotoie, eno athi kutsughu tuyitu hutoi kakaike.

²⁵Pano shohe ithughi aye, akumtomi mu ichive chenie.

²⁶Azuta pa shou ghipuku namu ghisumlae, angu na apiji na ayighasu namu pa shou chhepuku mlae.

²⁷Pa ghenguno ayi ye aghijini paphie, eno alazayi ye asukuma paphie.

²⁸Kiu piji nomu pa hapupo mlae, eno pa veha keu tu ye ayephika paphi shivetsue.

²⁹Pa ghenguno akulosuye ayephika paphie, ayighasu chepuwo aye pano junu chenie.

³⁰Pa puqholo alitsa kughupo tsughaminheyi ke hutoi anie, eno pa no cheu kelo aniba shou akhuwa no xupe puake toie.

³¹Pano azughi lo ali muqho ake toi mulaghubei chenie.

³²Pano wuveke thiu phuphuyi keu la auve cheni, eno azughi qunyi kughulho vetsu cheni.

³³Ayeghi shou pa kimihi kuhae, Akumsa kuhakeu lhoxue.

³⁴Akiqheu lhoxu shi aghi namu pano jukunathae, paye tughashi kumtsu shou akukau lakhie.