Read Sumi Naga JOB 42 Bible Online

JOB 42 - Sumi Naga bible

JOB 42

¹Job no hipau AMPEU khochile:

²Ino ithi nono shimlakeu thime kumu kuhae eno okimiji ye kumtsu shi kupu cheni.

³Niye thime khikhi ighenguno ighono akumzapu keno mthamu tipaqo pesu pivae.

⁴Nono piakelo ivilo inijulo pike eno nono iniju akeu khochileju lo pike.

⁵Niye chikulu tsalo likhino no ithi ake, ikemu itehiye inhethino no khuu kela ithiluvae.

⁶Ino akumtha lono oghili kiu pipani keno tipaqo kumtsu xachileve ani eno iqi aqhokigheu lono ino olau saideghi ani.

⁷Kughou AMPEU no hipaqo kumtsu Job vilo pitave kethiu, pano Elifaz, Teman phughimi vilo pi, “Niye no eno oshou kini lau agha ide ani, kughengu nonguno achipi lono iqeu Job no ighili pitsukeu toi pimoe.

⁸Tighenguno amshitsu, tsuni bheritsu tsugho pesu iqeu Job lau wuno nongu ghenguno akipiti kumllagho shi-ghi tsulo, eno pano nongu ghenguno inikhu tsunani. Ino pano inikhukeu vechewo nonguno ighili pipusavekeu kipimi qhivetsu nani, kughengu nongu ye iqeu Job no ighili pitsu keu toi pitsumoe.”

⁹Tileno Elifaz Teman phughilomi, Bildad Shuwa ghakhumi eno Zofar Nama no ghakhumi pano kuthu ye AMPEU no ahza tsukeu toi shi eno AMPEU no Job no panongu ghenguno inikhu tsukeulo chilutsue.

¹⁰Ikehu AMPEU no Job tinhemgha saideghitsu, kughengu pano pa shounoqo ghenguno inikhtsue. Thosulo nguno kinino vekighishe ghi pawu tinhemgha kumtsu kumghavetsu.

¹¹Tithiu pa thikuzumi, pa chelimi eno thosulo pa kilekithimi kumtsu ighino pa sasu aghulhu shilu. Panongu kumtsu pa kimiyeke tsa pi-ghi pa lokughuno tsu, khikhi AMPEU no ado lakhi lo pa shikighimeve kemu. Eno panongu lakhi khino pisa hami eno shuna nguthi pa tsu.

¹²AMPEU no atughulo Job no pighichekeu nguno alau shi pa kumghatsu. Ikehu paye bheri 14000, kemel 6000, amshitsu 1000 eno gadahali 1000 ishi pighiluve.

¹³Pa ye anu tsuni anga kuthu ithulu.

¹⁴Pano atotiu anoghiu je Jemima kutsu, akiniu je no Kaziya, akuthuu jeno Kerenhapuk kutsue.

¹⁵Tipa ghulokilo ayeghiqhalo khunomu Job ngaqo toi ajukivi kuhae. Job no panongu pelimi toi amheghi ghi panongu tsue.

¹⁶Hitoi pa ghimeve kethiu Job ye ampe 140 kutolo xu no pa tilimi tiqheli abidiu kutolo pa nhethino ithulu no,

¹⁷ighono kitemi shino thive.