Read Sumi Naga JOB 5 Bible Online

JOB 5 - Sumi Naga bible

JOB 5

¹Job, khualano okhochileni mala kujulo. Akimthemi khuala lau tsughu wulu nani kya?

²Amlo putakeuno mbomzumi pithive cheni. Aghichikupono amlo kughulami ghiqhive cheni.

³Mbomzumi ye akuhu qusulu ketoi ino ithulu anamu, ino pano kibo shou zuleno ghushobe puku cheni.

⁴Pano nuliye ijehkulupu kuhae, atsakukugha a lo khunomu panongu xaphe mono qodave cheni.

⁵Muzuthi kemino nowu tuxatini chuve cheni, asahuli lo aghinamu ikhiluve cheni eno tughuthi kemino pano kuakini mine cheni.

⁶Kughengu shilukusaye ayeghi lono thu ipeghi chemoe eno ghichhe ghimeye ayeghi lono lho ipeghi chemoe.

⁷Ikemu timiye aghichheghimelo punusu amisu mpa kelo ami no kunguu ye ikuve cheke toike.

⁸Ino no shiaghike aye, niye Alhou lau wuno ivehu pa vilo pini cheke.

⁹Pano ninguno lhemlakeu thime kije mla cheni. Pa kumzapu kumla ye kihi khamlae.

¹⁰Pano ayeghi shou tsutsughu ghuqhitsu eno aluzalo azu puwutsu cheni.

¹¹Pano aqhokighemi akuchuqulo suqhe cheni eno qa-mlo akemi kumtsu loshipivitsu cheni.

¹²Alhou no amqukinimi kukughu hexa vetsu cheni, ikehu panongu kumla kughutha lakhimu achipikalu chemoe.

¹³Pano muqumghami pelo pano lichhe lono kitimevepe cheni. Eno chighichilai kemino kuchughupe puakeu tomlavepe cheni.

¹⁴Panonguye puchou aphi lono akuzu sasu kushove cheni. Eno pucho mugho aphi lono putholo kukaju ketoi cheni.

¹⁵Ikemu Alhou no panongu baxa lono mighimi eno akumtomi u lono athokhami xaphelu cheni.

¹⁶Ikehu kumlhomi ghengu lakujupu anie, eno amikucho kumomi kichi khavetsu nani.

¹⁷Alhou no sakiyi kemi lokivipue. Tighenguno tuchomujokutsu-u no ghasu keu hebide kevilo.

¹⁸Pano ghuza keu pano khavetsu cheni, pano hekeu pano shipivitsu cheni.

¹⁹Pano akupuna tsugho lono oxaphe luve nani iyei akutsuniu loye alhoksa pelo obu pemo nani.

²⁰Puqumiye ighi kelo pano opuxulu nani, eno aghukishilo azuta angu zulo oxachilelu nani.

²¹Kulabide keu mili lono Alhou no osunhechile lu nani, kutsakungo keu ighikelo noye msamo nani.

²²Puqumiyekeu eno kutsakungo keu nono junuve nani, noye tughashi msa kepu kuhae.

²³Kughengu nono hochekeu lulo atu kuha nani tughashino khilemu ohamo nani.

²⁴Tile nono alokughuno shi okilo ngolu nani. Nono otsu-aqu jukelo panonguye puhamono aghi nani.

²⁵Opitino kutomo shivekeu nono ithi nani, eno oti kughukono atsaneghu jehi nani.

²⁶Ghile kuhu kutolo aghi nimuzu ketoi noye ate-asu kuto xu nani.

²⁷Ninguno hipau tsaquyi ado kushuwa phikide kudajuvae, hiye kuchoue, eno okivipu ke hi ikhilulo.