Read Sumi Naga JOB 6 Bible Online

JOB 6 - Sumi Naga bible

JOB 6

¹Iputaqhi akeu eno ingukusa kumtsu pesu kumtsa akimighipu lono mighijulu keaye!

³Tishi keaye hipaqono azughi saye nguno akimishiu shi aghini cheke. Ikehu itsa kumghalo nongu kumza akepu kuhae.

⁴Tuchomujokulu Lhou no aleghu pesu ika ke, tipau tughuno iphi kumtsu ghuvae. Alhou no shikichi keu pesu ajoshi ikichi anie.

⁵Gadaha ye kughono achumuzani keno igha chemoe momu amshi ye aghijini chuakelo iqunei acheni.

⁶Khuno isaphayi keu chuqu amti sumono chulu nani kya? Awukhu kimiye lo kiu mulluyi keu ani kya?

⁷Akhu amzu lomu niye tipaphi chuqupu bumoe, tiye ighenguno achuqupu munave keu paphie.

⁸O! Alhou nono ino qhuiniju akeu itsu keaye! Pano ikighini khochiletsu ke aye!

⁹Alhou pelo iheqhive pemlae! Pa-u chhopuwo imcheve pemlae!

¹⁰Pano tishinikeu ino ithike aye, ilokughunopu ke. Ighime lomu alokivishi ilheni ke. Kughengu niye Akimtheu Alhou tsa milivetsu mphie.

¹¹Ikumtoye kiu keno kheakepu anikya? Lakujupu ighengu kiu ani keno kutu-u khe ani kya?

¹²Ikumto ye asu-atu kumto ke sha? Momu iphi ashiye ayi kya?

¹³Ikuphu kulupu ilolo kuhae, pekishe kulupu kuka ilauno hapupove tsuae.

¹⁴Alhou no qhive aghi namu, akuxu iju akemi lau ashounoqo no kupukeu pephetsu kepue.

¹⁵Ikemu ithikuzumiqo ye aghokiti toi pishikiqhimie, eno zuqo zuno tsughumo aye hauveke toike.

¹⁶Aghokiti no murasu ngo avuno chhitoi ano, akulu tsalalo tipaqoye hauve cheni eno aghokiti hu chetho qhai kuhave cheni.

¹⁸Alhi shiwuniye izuchekemino azu phuchekelo hule hile toi puzu ala puhaveno thive cheni.

¹⁹Sheba ngo Tema lono alhishiuni ye izuwuchekemi no laju ghi phucheke,

²⁰ikemu panonguno pukhu akeulo kujove, eno ti tokelo panonguye aghuthisuve.

²¹Ighenguno nonguye titoikeu ghokiti paphi shivae. Nonguye ino ayikipiji shi akeu ithulu puzu ighuveke.

²²Niye nongu vilo agho lakhi ichhelo pikeshea? Momu nongu wu kuakini lono izuqhushi kulugho khiuala tsulo pi kesha?

²³Maye, ighumi u lono ixaphelu lo pikeo? Momu iqhasupe akeqo launo iqhuphelu lo pi kya?

²⁴Ikipimi kichephepiyelo eno ino inaqhoive nike, niye khileno ala izuve aghikela ipelo mutsumishei ithi pelo.

²⁵Muzuchoi pikeu tsaye kiutoi mughachhoi kya? Ikemu alokutsumie pikeqo tsapino kiu kilephelu kya?

²⁶Amlo hauveno akemi tsapino abokumsa aye, nonguno atsa kile phelu nani kughashi ani kesha?

²⁷Nonguno mighimi muxaluniye asaqhibe cheni, eno shompami alhikishimi lono saqhi acheni.

²⁸Itehi ye puloniqhiyi ilau jupuwo lo kughengu nongu gizulo niye mikimoke.

²⁹Nonguye ihulove ake pimi akevelo, ideghi kithelo, kughengu imikucho achipilo aphike.

³⁰Imli vimo aphi kesha? Momu itahaye shiluksa miche mula aphi kesha?