Read Sumi Naga JOB 9 Bible Online

JOB 9 - Sumi Naga bible

JOB 9

¹Tipaqoye kuchou kepi nighi ithi ani. Ikemu timiye kutsalakile kelo kishieno Alhou shou achipiu shiluni kya?

³Khunola Alhou sasu kutsala aye, pano qhethonhe kuto iniju kelo lakhimu khochilemla nani.[3]

⁴Alhou ye alokutsue eno akuka kumtoe mujochilekemi khu-u no xusulu kya?

⁵Khumu mthano pano naghuto pe kiqeve cheni, eno pa xuide kelo tipaqo pukhuleve cheni.

⁶Alhou no ayeghi tsukucho[4] sukini cheni.

⁷Pano tsukinhe pelo ipeghipemo velu cheni, eno ayepuqo khonhape qhive chenie.

⁸Alhou likhino atsutsu sukhoke, eno azughi ghahwu ghutsu nedake.

⁹Alhou no ayepuqo lhoe - Ayis[5] ipichekeu yepuqo Pughu no supemi, Ayenokilimi eno apeu kudau Teman[6] ipiche keu yepuqo.

¹⁰Pano thime kije mlakeqo ninguye ithi kuthumlae, eno pano akumzapu jeli shikeu kihi khamlae.

¹¹Julo, pano ivechesu wunamu niye pa ithumlae pano chesu wuve keghi niye anhetsu shimlae.

¹²Julo, pano muxasuwuve a namu khuno pa hachileluni kya? Khuno pa vilo “Noye kiu shi anikya?” ipi luni kya?

¹³Alhou loghuye ideghimoe, Rahab[7] saphukemiqo hu pa qholo wovae.

¹⁴Ike niye kishi puzu pa khochileluni kya? Momu kiu tsa kishepe pa ghechileluni kya?

¹⁵Ta niye achipi shi anamu pa khochile mlae, inguku akeu vilo ikimiye lopi qhuiniju masavae.

¹⁶Ino pa kukelo pano ikhochile pinamu paye isutsa initsu naniepi pulumlae.

¹⁷Pano pasapagha pesu ihepungo qhie, eno akiqi kuhamu ighuzaku ghilekitheve tsue.

¹⁸Pano ipelo ituthu mu shelu pemoe, akukhu kimji likhi pesu iveqhie.

¹⁹Ino anguka vesuni keno, Alhou shou anguka vesu kulupu kumo, ino pa sasu kughakutha-alo wuni keno, khuuno pa kuwu kulupu kumoe.

²⁰Niye achipi shi anamu, itsaye kuqu akehutoi. Niye viwoto aghi namu pano ikughape chighichilai vetsue.

²¹Niye mzuchoi aphie, ikemu ikuxu palokutoae; niye ikuxu jukuchhube auvae.

²²Kumtsu aphiphie, tighenguno ino pi ani: Alhou ye akumzumi ngo kusakughami aphiphi shi heqhi cheni.

²³Kughono zuqono zule lono akithi saghini keno, Alhou no tichetighe kuhakemi zukuzu junu chenie.

²⁴Ayeghiye kusakughami ulo suvetsue, ayeghilo kughakuthami, gi shonhave tsue, Alhou no kumoaye, kutami khuno ti shi kya?

²⁵Itsalaye pochekemi nguno akumthue, tipaqoye pokhavae eno akiviye kiu kela lakhimu shomlae.

²⁶Itsalaye anige yephe pe yewuveke[8] toivae. Aluqu no awu peni kelo pukope iqighi ketoivae.

²⁷Ino ighime kumsumavejuni eno igi kuzu shimono ihu miyi ju namu,

²⁸Ikusu musae, kughengu ino ithi ani, Alhou no ikipimi shitsu nani.

²⁹Niye akipimiepi aniche nike kushiepi niye adou lono ivepuka ju ani kya?

³⁰Sapun pesu ilikhi iqhuve pinamu, eno ayevu no i-u mutsuve namu;

³¹Alhou no aqohlo itukulu suve nani eno iphimini papuno iju kuchhube nani.

³²Paye itoi timi kumoe, ike thono pa ghechileni cheke, ikujo kughakutha-a lono xatha wunishie!

³³Alhou ikujo dolo sukhotsukemi aghipenishie! Ikujo dolo pa-u betha penicheke!

³⁴Tishi anguno Alhou pelo apikugha imuqa lono pewuve pe, eno pa kikichi pesu ishikichi pemonike.

³⁵Tithiuno pa musamono ino piniaphi; kughengu niye pimi mphie. Ikemu niye tishipi kulupu kuhae.