Read Sumi Naga LESHELE 10 Bible Online

LESHELE 10 - Sumi Naga bible

LESHELE 10

¹O AMPEU, noye kushiye putou auvea kya? Nivekusalo noye kushiye itshu auvea kya?

²Kixikilamino aqhekuza shi kumlhomi hakuqoqhi cheni, panongu muqu lono pano meluve pelo!

³Kixikilamino pa mlo lhoksa pesu qheza-laki cheni, ala kiminemino AMPEU ghusho eno AMPEU milive cheni.

⁴Kixikilamino pagi kumobeyive puzu AMPEU phujumoe, pano kukumsulo Alhou sumomithe.

⁵Kixikilamiye ala thwokhalo chijelu cheni. Alhou wu kughakutha paye ithini chemoe; Paye aghumi muqhumza kichi cheni.

⁶Pa likhi pa vilo ishi picheni, “Niye khilemu ikiqimo nani; tiqhelino tiqheli kutolo niye shilu kusa sholumo nani.”

⁷Pa kichilo ghukusho, akimki, kiji kupusano chhitoi ani; pa milibo qholo ghuzakepu ngo chighichilai keu ani.

⁸Paye aphulo itshu pesu ngono pimimo kemi heqhinike khe cheni. Pa nhethi nheghouno akukuphu kuha kemi ju acheni,

⁹Paye abongushu toi pa kughutshu alo acheni, paye kumlhomi kughaluniye khe acheni, panoqo ye pa lichhe lono meluve eno sunhe sawuve cheni.

¹⁰Akukuphu havekemi huye chunutha pinyive; pa ka-agha pesu panoqo suqoqhi.

¹¹Kixikilami no pa mlolo ishi kumsu, “Alhou ye kumsumavae, paye pagi kusuluvae eno khilemu hi ithini chemoe!”

¹²Ithulo, AMPEU; O Alhou, kixikila mi hupaqo ghimeqhilo; shiluksami kumsuma kevilo!

¹³Kishino kixikilamiye Alhou phimo gihumo cheni eno pa mlolo, “Alhou ye ighimeqhimo nani” ipi chenipe kya?

¹⁴Ikemu nono ithulu ani; shiluksa eno ghichhe-ghime nono ithitoi ani eno kuphuniye khe anie. akukuphu kuhakemino pa likhi pa pesu olau kulhuqhi; nono mighimi kuphu acheni.

¹⁵Kixikilami eno alhoksami kumto ghachheve tsulo; panonguno achipikumou shikeu ghenguno ghimeqhilo, panonguno tipau tamoke kutolo.

¹⁶AMPEU ye alhokupujulo akukauke; kutau lhou mllakemiye pa yeghi lono hauve nani.

¹⁷O AMPEU, noye aqhokighemino qhuiniju keu initsu nani; nono panongu mlo shikumto tsu nani.

¹⁸Nono mighimi ngo akijipusape akemi lau okini kughopuwo nani; nono panongu saphughi kughathani, tishianguno ayeghi mukhu ilhouveni keu timi pelo khilemu kutami shithughuyi pemonike.