Read Sumi Naga LESHELE 103 Bible Online

LESHELE 103 - Sumi Naga bible

LESHELE 103

¹[95] O ingulho, AMPEU sheqhelo! Ilolo akeu kumtsuno pa kimtheje sheqhelo!

²AMPEU sheqhelo, ingulho, eno paye kiutoi kimiyekini keno kumsuma kevilo

³Pano ixine kumtsu pevetsu eno ikusukini kumtsu shipivike.

⁴Pano akumoki launo ikuxu xapheke kikimiye ngo kupukini pesu ikumghatsuke.

⁵Pano akivi thimeqo pesu ikuxulo tsue, ikehu niye aluqu lhothe toi mutotoi ani.

⁶AMPEU no nedaqodavekemi saphu ghi kughatha cheni eno panowu kiu keno tipau panoqo tsucheni.

⁷Pano kughupe qhipuakeu Muse lau piyeke eno Israilmi pelo akichiqhi kepu kumla ithulupe.

⁸AMPEU ye kupukini eno kimiyekini, asheshino axuidekeu eno iqemo keu kikimiyeno chhitoi akeu.

⁹Paye pulhapuju sakiyi achemoe; paye pulhapuju aloghu ide chemoe.

¹⁰Paye nino ithulukepu qhemi ni ghimeqhi chemoe, momu ni xine eno ni kipimi ni lochile chemoe.

¹¹Atsutsuno ayeghi nguno qhemghai ke toi pa gihu chekemiqo lau pa kikimiye kije anike.

¹²Kipelauno kulolau sasu putosupe ake toi pano ni xine nilauno titohi ikhipe wuvetsue.

¹³Apu lakhino atianuli kimiyeke toi AMPEU ye pa gihu kemi lau kimiye keu acheni.

¹⁴Ninguye kiu pesu lhopepuani keno pano ithi ani; ninguye ayeghi mukhu kepi pano kumsulu ani.

¹⁵Ni ghenguye, ni kuxuye asutsuni paphike, tughalo xamunu toi ninguno thuwu eno azunihoi acheni;

¹⁶Tileno tipa shou mulhu pukuaye tiye cheve cheni khunomu itaghi tipau ithulu chemoe.

¹⁷Ikemu khunono AMPEU gihuni keno, pa kikimiye panoqo lau alhokupujulo ani; eno paye akivike pikeuno tiqheli kumtsu shou ani.

¹⁸Khunono pawu puloshoqhi kuchou shi ikhilu eno aghokulushi pawu ahza papeni keno tipano lau akivi shike.

¹⁹AMPEU no kungughalo pa kuka lakhu qhike; Paye kumtsu shou akukau.

²⁰AMPEU shelo, nongu akumtomi eno kungumi akughushumiqo, pa zahkutsu papeluche kemiqo, pano pikeu inichekemiqo.

²¹AMPEU shelo, nongu kungughalo akuka jeliqo, nongu pa qemi, pa gho apulou shichekeqo!

²²AMPEU shelo, pawu lhoxu jeliqo a-a kumtsulo pano ayehpe ani, AMPEU shelo, O ingulho!