Read Sumi Naga LESHELE 104 Bible Online

LESHELE 104 - Sumi Naga bible

LESHELE 104

¹AMPEU shelo, ingulho! O AMPEU iLhou, noye kiutoi kije kya? Noye ajekipi eno akimthe jukuvu pepu anike;

²Noye akuvu pesu okuzupu anike, nono aphiki sukho ketoi kungugha xakhoke.

³azu kunguu akeu shou oki shipe puani. Noye khungkusu pesu owu khurkulu shicheni eno amlhu chishibo shou iqa cheni.

⁴Nono amlhu pelo oghinimi shi peitha cheni eno tsutsu kulono oqeu toi peitha cheni.

⁵Nono ayeghi pesu mutotoi pabo qhalo shope puani, tiye khilemu ithamoke.

⁶Nono azughi pesu aphi hutoi tipau nhapuani, azuno naghutoqo kuzupe ani.

⁷Nono azu sakiyikelo tiye pove cheni, nono ahza tsukeu ghugha chiluaye panonguye kohawuve cheni.

⁸Panonguno naghuto shou qowu eno akhilalo qowu cheni, panongu ghenguno nono kutotsu keu alo wuve cheni.

⁹Nono alughi shopuatsu eno panoqo ye ti khilemu vechemla, tishikeuye panoqo pelo ayeghi kuzulu kitheve pemo niyeke.

¹⁰Nono akhilalo azupuki qoipe ghipe, eno naghuto dolo aghoki qowupeke.

¹¹Tipaqono tughashiqo azu piyeluke, tileno agha gadahaqono atughu ghasuluke.

¹²Tipaqo phivilo asubo akeulo aghau qono apusu pesuno alepheke.

¹³Atsutsu kudauno nono naghuto shou ghuqhitsuke, eno ayeghi ye okukumghano chhitoi ani.

¹⁴Nono pichepighi ghenguno atsuni thuwupeke, eno timi pelo atsuni peithalupeke, tishianguno pa pelo axabo chilupeke;

¹⁵atsayiji mlaphe pesu pa lokivishi lupe, pa zupuvu tsunike oliv teli ipeghi; akumto pa tsuni kepu asho mlaphelupeke.

¹⁶Libanon lo kedar subono tsutsughu kutomo ithulu, tiye AMPEU suboqoke, pano shosuke.

¹⁷Tipaulo aghauno apusu pesu, azughauno sapunadu bolo apusu pesu.

¹⁸Aghalo neqono naghutolo acheni eno achighino atuxulo itsu acheni.

¹⁹Nono aqhi lhophetsu, aqhi kihikutha apeniyeke; tsukinheno ilove nikeu do ithi ani.

²⁰Nono putho mlatsuke eno akuzu lono tughashi kumtsu khalacheu ipeghi cheni.

²¹Abongushu lhotheno tughashi hakelo igha cheni, Alhou no kophetsukeu chuqupu phucheni.

²²Tsukinhe ipeghive kelo panonguye idewo cheni eno pano kughu tshualo zuauve cheni.

²³Tileno timino pano kumla shiniye wuve cheni eno avelau kutolo mla acheni.

²⁴AMPEU, nono thime kutomo mlape puani! kiu lokutsu lono pano lhokelae! Ayeghiye owu lhoxuqono chhitoi ani.

²⁵Azughi kije eno akuloghi, tilehi lhoxu kije ghi kitila ghi phikhakumla xu ani.

²⁶Zukilu no tipau shou no wu, eno tipau alou Leviathan no ili acheni, azu-ghahwu nono lhoqhike.

²⁷Panongu kumtsu achuqupu tsupe nike eno ti avehupu shikelo tsupe nike oshou bepe ani.

²⁸Nono achuqupu panoqo tsuche eno panonguno ti chu cheni, nono achuqupu tsuaye panonguno aghaqive cheni.

²⁹Nono ogi tsughuve aye panonguye musave cheni; nono panongu tuthu luveaye panonguye thive cheni; eno ayeghi mukhu khipau lono panongu ipeghi keno tile idewove cheni.

³⁰Ikemu nono atuthu panongu tsuaye panonguye xuluve cheni; eno akuxu kithe ayeghilo tsuke.

³¹AMPEU jekipi alhokupuju achelo! AMPEU pelo pano lhokeu shou alovi pelo!

³²Pano ayeghi juaye tiye khokhoshi itha; pano naghuto buaye, tiye amchhi phopipe acheni.

³³Ikuxu kupujulo niye AMPEU shipilini; ino xuake kutolo akishe lephepe iLhou tsuni.

³⁴Ino alephekeulo pano alokiqi shi nani, kughengu ilokiviye pa launo ighi cheni.

³⁵Ayeghi lono axinemi kutsapinyive pelo; kixikilami kuhave pelo. AMPEU sheqhelo, ingulho! AMPEU sheqhelo!