Read Sumi Naga LESHELE 106 Bible Online

LESHELE 106 - Sumi Naga bible

LESHELE 106

¹AMPEU sheqhelo! Shikimthikeu AMPEU tsulo kughengu paye aloke; pawu kikimiye ye lhokta kutoloke.

²Pano akumla kije mlakeu khuno piluni kya? khuno pa sheqhekha kulupu kya?

³Khunono pano ahza tsukeu agho kulushi peluni keno tipano kumghae, khunono pulhapuju achipiu shicheni keno tipano kumghae.

⁴AMPEU, nono owu timiqo kuphukelo nighi kumsululo; Panoqo xalukelo nighi kiyesulo.

⁵Ipelo owu timino kinikulu shilukeu ithulupelo eno ashiayeh lokivi gholo kusajelu pelo; Owu shiluvekemino akijivile keu gholo sulupelo.

⁶Ni puasuqo toi ningu ghi axine shiveake; ninguye kixikila eno alhoksake.

⁷Ijip lo ni puasuqoye Alhou no akumzapu kumla shikeu vethamlake; ghuthu kutomo pa kikimiye panoqo piyekeu kumsumaveke, panonguye Akuhu Zughilo chekelo Akughushuu shou hebideveke.

⁸Ikemu pano piqhiveke toi panoqo xalue, tiye pa kuka kumto piye niyeke.

⁹Pano Akuhu Zughi ahza tsukelo tipauno thoqhaive; Pano ayeghi qhaikeu lono paw timiqo sawuke.

¹⁰Pawu timiqo mithichekemi launo pano panongu xalu; panoqo ghumi launo panongu xalu.

¹¹Azuno panoqo ghumi putsuqhive eno milakhimu ghupeqhimoe.

¹²Tileno pawu timiqono pa shoqhi pululu eno shekiqhe le phepe pa sheke.

¹³Ikemu panonguye pano mlakeu hu pai kumsumave; eno pa kukutsu khemono mlaitha wuve.

¹⁴Panonguye asayeqhalo mihemza keuno chhitoive eno Alhou ghukejuke;

¹⁵Ikehu panonguno khukeu toi panoqo tsuke, ikemu panoqo gholo akusu lhoksa ghi puwuke.

¹⁶Aghazulo panonguye AMPEU akimtheu qeu Muse ngo Aron pama jupe anheshuve.

¹⁷Tileno ayeghi ikotha ipeghino Dathan munove eno Abiram ngo pa kibo qholuve.

¹⁸Panoqo pape chekemi shou ami iqi ghi eno ti kixikilami pitiqhive.

¹⁹Sinai lo panonguno shunayino amshitsu shisuno ajulho tipau mllawuve;

²⁰Panonguno Alhou kimthe jukuvu pesuno atsaneghu chuchekeu lhoxu julho sasu kusukidiuve.

²¹Panonguye Ijip lo Alhou no akumzapu kumla shino panoqo xalukeu Lhou kumsumave.

²²Paye kiutoi akumzapu kumla tilau shikela! Akuhu Zughi lo akichiqhipu kishi shikela!

²³Alhou no kughou pawu timiqo kutsa venipi kelo pano kishelukeu aqeu Muse no Alhou vilo moe pikeno panoqo kutsaleve nikeu loghu hu lakhaluke.

²⁴Tipashelo panonguno achhigha kivi yeghi milive kughengu panonguye Alhou shoqhi pulumoe.

²⁵Panonguno pano phikilo ngo auve no muchhoke, eno AMPEU tsa initsumoe.

²⁶Ikehu pano khenguyi panoqo kutughu keuno panoqoye asayeqha lono thinikeu shive.

²⁷Panongu tianuliye ayekumthami gholo halepuwuve, eno pano qoye inami yeghi lono thipeni keu shive.

²⁸Tipashelo Peor lo Alhou timino Baal mlla nikeu shi pulolukhave, eno heqhipe akithi lhou mlla keu chue.

²⁹Panonguno hitoikeu shikelono AMPEU loghu kighideveno akusu lhoksa panongu gholo ipeghive.

³⁰Ikemu Fineha no puthugho puzu akipimi shivekeqo ghimeqhi kelono pusa huye tave.

³¹Paye achipi kepi pa kumsulu acheni eno ighinikeu ghulokilo ghi tishi wonia.

³²Meriba zupukilo timiqono AMPEU pelo aloghu idepe eno panongu ghenguno Muse ye kupunave.

³³Panonguno Alhou ghungu hebideke ghenguno Muse pelo kukhu kimji kumsu kutojumono piqhivepe.

³⁴AMPEU no panongu vilo Alhou phimo kemi pithivelopi ahza tsukeu shimove,

³⁵Panonguye tipaqo sasu kulakupu shikile eno ayekumthami kuxu ghola pewuve.

³⁶Alhou wu timiqono ajulho shisukeu mllawuve eno tishikeu lono pano kutsalevekepu shive.

³⁷Panonguno anu ngo angaqo heqhipe Kananmi no ajulho shisukeu mllake.

³⁸Panonguno pimimo mithe kemi anuliqo pithive keu ghenguno ayeghiye ghikiqhimino shipixi veke.

³⁹Panongu kumla kughuthano pano likhi pano shipixiveno Alhou lau amikucho kumove.

⁴⁰Ikehu AMPEU ye pawu timiqo lau axuideve; panongu jupe pa mlo zuzushive.

⁴¹Pano panoqo pesu ayekumthami kukalo qhivetsu eno pano ghumino panoqo shou kache.

⁴²Panongu ghumiqono panoqo qhasuche eno ithamlano panongu qholo ache.

⁴³Ghuthu kutomo AMPEU no pawu timiqo xaphelue ikemu panonguno pa hebide nikeu kisheluno axinelo thonhei ilokitheke.

⁴⁴Ikeghi panonguno ighamuku kuphulo piaye AMPEU no chilutsuke, eno panonguno aghimeshi akeu ithitsu che.

⁴⁵Panoqo ghenguno pawu puloshoqhi kumsuchilelu, eno pawu kikimiye kije akeu lono pa mlo ighiveche.

⁴⁶AMPEU no panoqo qhasupe akemi pelo panoqo shou amlo saqhiyilupe cheke.

⁴⁷Ni xalulo, O AMPEU niLhou, ashiayehqo launo ningu sachile saghi tsulo, tishianguno ninguye oshikimthini eno oje kimthe sheqhenike.

⁴⁸AMPEU sheqhelo, Israilmi Lhou; Itehi eno alhokupujulo pa sheqhelo! Kumtsu ghano “Amen” ipilo AMPEU sheqhelo!