Read Sumi Naga LESHELE 107 Bible Online

LESHELE 107 - Sumi Naga bible

LESHELE 107

¹Shikimthikeu AMPEU tsulo, kughengu paye aloke; pa kikimiye lhokta kutolo ache nani!

²AMPEU no khunoqo shiluksa lono xaphelu keno tipaqono panongu xaphekulu ghili pilo. Pano noghumi launo xapheluke,

³inami ghakhu, kipela, kulola, ahuu eno apeu no nongu sachile saghike.

⁴Khamiye asayeqha pulakeu la kuha keulo itsuche eno aphughilo ngo nikeu alaghi phumlave.

⁵Panonguye muzuthi tughuthiche eno lajupu kumtsu hauve.

⁶Tileno panongu shiluksa lono AMPEU vilo khuke, eno pano shiluksa lono panoqo xalue.

⁷Pano muzuchoikeu laghi lono panongu sasu aphughilo wuke, tilehi panongu pelo xulupe.

⁸AMPEU no panongu ghenguno akumzapu kumla shitsukeu eno pa kikimiye ghenguno pa shikimthi kepu.

⁹Pano tughuthikemi tughu ghasutsu eno muzuthikemi thime kivi pesu apo pichhitsu.

¹⁰Khamiye akuzulo xuacheke, akughumiye ayikichheno tsuhpe aghimeshi ache.

¹¹Kughengu panonguno Akughushu Lhou zah kutsu eno akukutsu tsa hebideveke.

¹²Panonguye akumla kushokutsu shikeu lono akulho shive; panonguno iluqive kelo khunomu xaqhemoe.

¹³Tileno pano shiluksa lono AMPEU lau ighamuku kuke eno pano panoqo ghime lono xaluke.

¹⁴Panoqono akuzulo akeu lono pano saipeghi eno ayikichheyi hu mukhumuno shi kubovetsu.

¹⁵AMPEU no panongu ghenguno akumzapu kumla shitsukeu eno pa kikimiye ghenguno pa shikimthi kepu.

¹⁶Pano alazayi hukikha kubopinyive tsu eno ayikhadu hechhetsuke.

¹⁷Khamiye pano kuxu lhoksa ghenguno kusukini shikeu ake, pano xine ghenguno aghime kitikhi sholuke;

¹⁸Panonguye achuqupu ghi chusumlano thinikeshive.

¹⁹Tileno panongu shiluksa launo AMPEU lau ighamukuke, pano panoqo ghime lono xaluke.

²⁰Pano ahza tsukelo panoqo shipivive eno akumoki lono panoqo xaluve.m

²¹AMPEU no panongu ghenguno akumzapu kumla shitsukeu eno pa kikimiye ghenguno pa shikimthi kepu.

²²Panonguye agha shipe pa shikimthi mlla kepu eno alokivi le phe pesu pano mlatsu keu kumtsu lhekepu.

²³Khamiye zukilu lono azughi shou chewu azughilo kumlano pano poqelu che.

²⁴AMPEU no azughilo panongu ghenguno akumzapu kumla shikeu panonguno ithi.

²⁵Pano ahza tsukelo amlhu kuloghino mulhu eno azutukucho xukuthoke.

²⁶Zukilu hu qhemghai ikuveno itaghi akutholo ilove. Hikithipu kumsapulo timino amlo hauve cheni;

²⁷Shokumzumi toi timino izuvulai veno shokukhope acheni, panowu shitsa kumtsu adouke.

²⁸Tileno pano shiluksa lono AMPEU lau ighamuku, pano panoqo shiluksa lono xaluke.

²⁹Pano pasapagha kighide ghasuve eno azufukukuchoye iquneive.

³⁰Panonguye iquneive keu ghenguno alovive, panonguno zukilu kungo-a phuchekeulo pano sawo qhike.

³¹AMPEU no panongu ghenguno akumzapu kumla shitsukeu eno pa kikimiye ghenguno pa shikimthi kepu.

³²Panonguye pawu timi kuho akelo AMPEU ye kijekepi asheshu kepu, eno sakiphemi hoholo pa sheqhekepu.

³³AMPEU no aghokiqo kumtsu qhai vepe eno azupukiqo pelo qowu move peke.

³⁴Pano ayeghi ghuma kivi pelo amiti akeu asayeqha shivepeke tipaulo xuakemino alhoksa kumla shikehu.

³⁵Pano asayeqha pesu azu chope ngokeu shivetsu cheni, eno qhaikeu yeghi pesu azu qoipeghi keu shivetsu cheni.

³⁶Pano muzuthi kemiqo tile kughuna chenipe eno panonguno ngoni aye aphughi shi cheni.

³⁷Panonguno alulo axa yisu atsayibo shosuno kupukuno shi ghile hu chenipe.

³⁸Pano pawu timi kumghatsu eno panongu pelo atianuli kutomo achenipe; eno panongu wu pichepighi puha mono khetsu acheni.

³⁹Kughou Alhou wu timiqo ayikusano nedaqoda ghi eno aghimeshi haleluve eno shikumsaveni keno,

⁴⁰AMPEU no nedaqoda chekemiqo jukuchhubeve cheni, eno ala kuhakeu sayeqhalo hakughutsuve cheni.

⁴¹Ikemu pano kumlhomi pano kuxu kusa lono xaphelu cheni eno pano kibo pelo aloji toi ikowolupe cheni.

⁴²Amikuchomino hipau ithulu puzu alovi cheni, ikemu kixikilami kumtsu yenguivepe cheni.

⁴³Khunoqo alokutsumi keno hipaqo vehu kumsukutoju apelo; panongu pelo AMPEU wu iqemokeu kikimiye hu kumsukithe apelo.