Read Sumi Naga LESHELE 109 Bible Online

LESHELE 109 - Sumi Naga bible

LESHELE 109

¹[97] Ino sheqhe chekeu Lhou, inaqhoi auve kevilo!

²Kixikilami eno akimki kichi puche kemino ishou pi anike. Panonguno ishou mikikeu tsa lhe ani,

³panonguye ishou alhoksa tsa piani, kutsazuno ighime anike.

⁴Niye panongu kimiye namu panongu no isasu kumgho ani, niye panongu ghengu ghi inikhu ake.

⁵Panonguye akivi zuqhulo alhoksa eno kikimiye zuqhulo kimthikeu pesu itsuchile ani.

⁶Kixikila kughakuthami khami kishe puzu ighumi shou kughaju pelo, pa ghumi pelo pa nguku pelo.

⁷Pa lhekidekudaju puzu akipimi phulu pelo; pa kighini ghi heqhi buqhikeu shi kihivelo!

⁸Pa kuxu papashi ashekhashive pelo; kutami pelo pano mlachekeu luve pelo!

⁹Pa tianuli pelo mighimgha shive pelo, eno pa nipuye chimemi shivepelo!

¹⁰Pa tianuli pelo aki kuhakemi khukuchumi shivepe; panonguno ixapinyikeu alo akeu lono hapupovelo!

¹¹Pano apiagha tsukepushi akemino pa nhemgha kumtsu pewuve pelo; inami pelo pano mlapuakeu ithuluve pelo.

¹²Timi khuu pelomu pa kimiye pekevilo momu mighimghaqo shivepeniye pano qhivekeqo tuchope kevilo.

¹³Pa laghami kumtsu thikhave pelo, eno ighinikeu tiqhelilo paje kumsumave pelo.

¹⁴AMPEU pelo pa puasuno alhoksa mlakeu kumsuchilepelo, paza xine qo khilemu pevetsu kevilo.

¹⁵AMPEU no panoqo xine pulhapuju kumsululo ikemu panoqoye qhoi kumsumave pelo!

¹⁶Timi tipauye khilemu kikimiye yeh kumsulumoke, pano kumlhomi,aquaghami eno akukuphu kuha kemi shikimighi eno pithiveke.

¹⁷Paye ghusho nikeu kimiyeke, pa shou musuinivelo! paye kumgha tsuni keu mithike, timi khumu pa kumgha tsu pekevilo!

¹⁸Pano aphimini alhoayeh shi pepuke toi ghushokeu pepuke pa likhi pano ghushokeuno azu toi pa philo putsuluve pelo, teli toi pa ghianhu putsuluve pelo!

¹⁹Tipauno aphimini toi pa kuzuluve pelo eno apokha toi alhokuthu pa vehopuluve pelo!

²⁰AMPEU, ighumi khunoqono ishou alhoksa picheni keno tipaqo shou hipau gholauno ghime qhilo!

²¹Ikemu AMPEU iLhou, nono piqhi veke toi ikuphulo, okikimiye ye alokehu ixaphe lulo!

²²Niye kumlhomi eno aquaghami; imlo kutho kutolo ghuzavae.

²³Avelau yekukhu toi niye hauveni cheae; niye pitheninga toi fupe wuvae.

²⁴Achuqupu kuhake launo ikhonhe qei-naivae; niye kiumu kuhano ayiko eno aghi likhive.

²⁵Kughou timino ni ithuluni keno ijunu cheni; panonguno kuthakugha launo akutsu kungu cheni.

²⁶O AMPEU iLhou, ikuphulo; owu iqemokeu kikimiye ghenguno ixalulo!

²⁷Ighumi pelo nono ixalu kepi ithilu pelo.

²⁸Panonguno ighusholuvi ikemu nono ikumghatsu nani. Ighimeqhi akeqo haleluvelo, eno ni, oqeu pelo alovilu pelo.

²⁹Kujomzakeu pelo ighumiqo nhaluve pelo; panongu pelo aphikuzu uake shi akukujo upelo!

³⁰Ino AMPEU shikimthi ghi vekipighi pini; timi kuhokumqo akelo ino pa sheqheni,

³¹Kughengu pano kumlhomi sushope ngoke eno tipau pithivepeniye kughathave kemiqo launo pa xaluveke.