Read Sumi Naga LESHELE 115 Bible Online

LESHELE 115 - Sumi Naga bible

LESHELE 115

¹Olau likhi, O AMPEU, nilau kumono olau likhino akimthe jekipi tsumasae tiye owu iqemokeu kikimiye eno amikucho ghengunoke.

²Kushiye ashiayeh kutami pelo ni vilo “No Lhou khile ani kya?” ipi peni kya?

³Ni Lhou ye kungughalo ani; pano kiu shinishi keno tipau shicheni.

⁴Panoqo lhouye tsandiyi ngo shunayino shike, timi uno tipau kughulhoke.

⁵Tipaqoye akichi puani ikemu atsa pimla, anhethi puani ikemu ithumlae.

⁶Tipaqoye akini puani ikemu chilu chemoe, anigi puani ikemu tsungu mlae.

⁷Tipaqoye au puani ikemu bumlae, apukhu puani ikemu alachemlae; tipaqoye asutsa kuhae.

⁸Tipaqo mllakemi eno tipau pukhu chekemi kumtsu panonguno mlape qhikeu ajulho toive pelo.

⁹AMPEU shou pukhulo, nongu Israilmiqo, pano nongu kuphu eno susholuke.

¹⁰Nongu Alhou chinetomiqo, AMPEU pukhulo, pano nongu kuphu eno susholuke.

¹¹Nongu pa mllachekemiqo, AMPEU pukhulo. Pano nongu kuphu eno susholuke.

¹²AMPEU no ningu kumsulu puzu kumghatsu nani; pano Israilmi kumghatsu nani eno Alhou wu timiqo kumghatsu nani.

¹³Pa qhoqhu gihuchekemi pano kumghatsu nani, kijemi na kitilami namu.

¹⁴AMPEU no nongu eno nongu polo kughukomi lau atianuli tsu peniu!

¹⁵AMPEU pelo nongu kumghatsu pelo, pano kungugha ngo ayeghi lhoke!

¹⁶Kughughaye AMPEU wu likhike, ikemu ayeghiye pano timi tsuke.

¹⁷Kithimiye AMPEU sheqhelu chemoe, inaqhoivekeu yeghilo iqivekemiye sheqhelu chemoe.

¹⁸Ikemu ningu kuxumino shikimthi pa tsulu nani, itehi eno alhokupujulo! AMPEU sheqhelo!