Read Sumi Naga LESHELE 119 Bible Online

LESHELE 119 - Sumi Naga bible

LESHELE 119

¹Khuno kuxulo tukutiye kuha keno tipano lokivipu, AMPEU yezah kiqi lono xuchekemi lokivipuke.

²Khunono pano ahza tsukeu papeni keno tipano lokivipu, pano mlo kumtsu pesu agholukemi lokivipu.

³Panonguye khilemu akumou shimoe; panonguye AMPEU laghi pula cheni.

⁴AMPEU nono oyezah pesu nitsuke eno amlo kupushi tipau gholulo pike.

⁵Niye lajupu lono amlo kupushi nono kutsukeqo pelu anishike!

⁶Ino ozah kutsu kumtsulo amlo tsuqhiyi shi aye noye kujove mo nanike.

⁷Ino omikucho kughakutha shikalu aye niye amlo kimthe lono osheqhelu nani.

⁸Niye oyezah gholuni; khilemu iqhive kevilo!

⁹Lhothemi lakhiye pa kuxulo kishieno muqhamiqhiyi alu nani kya? Tiye nono ahza tsukeu gholukeu lonoke.

¹⁰Imlo kuchopu pesu ino oqenishi; oyezah hebidelu nosake isasu alo.

¹¹Ohekibide xine shimonike ino otsa imlolo kusuluvae.

¹²Ino osheqhe ani, O AMPEU, olaghiqo ishikapiyelo.

¹³Nono ayezah tsukeu kumtsu ino vekipighi pikithe nani.

¹⁴Niye ozahkutsu papeni keuno azukuvu shiani tiye akini kutsasa akeu nguno alauke.

¹⁵Niye okukutsu tsa phuju cheni eno nono kutsupiyekeu lheju acheni.

¹⁶Niye oyezahlo ilokiqipu acheni; nono ahza tsukeu niye kumsumamoke.

¹⁷Ni aqeu lau allokeu shilo, tishianguno niye xuaghi puzu nono kutsupiyekeu agholu penike.

¹⁸Inhethi xukhotsulo, tishianguno oyezahlo akumzapu kuchou akeu ithulupe nike.

¹⁹Niye ado ikhonhei ayeghi shou anike ozahkutsu ilauno kusuve kevilo.

²⁰Ohuqhekeno imlo sakutu ani; niye ado kumtsulo owu kughakuthaqo ithinishike.

²¹Noye aqhekuzami sakiyi cheni, khunono ozahkutsu gholumoni keno musuinivelo.

²²Panoqono piputha shiputhakeu lono ikuqhovelo, kughengu ino oyezah pechenike.

²³Ayehkipemino kusholu puzu ipithive niye kughu cheni, ikemu niye okukutsu phujunike.

²⁴Nono kutsukeuye ilokivipuke; tipa qoye akukumsu ipiyekemiqoke.

²⁵Niye tomoveno ayeghi mukhulo ihozuake, nono tushoqhikeu toi ixukithe tsulo.

²⁶Ino mlave keu kumtsu pipheveke eno nono ikhochileke; olaghi ishikapiyelo.

²⁷Oyezahqo ithikuthulu penike ikuphulo, eno nono kutsupiye keu akumzapu hu ino kumsukuto anike.

²⁸Niye amlo ghimeno chhivae, nono tushoqhivekeu toi ishikumtolo.

²⁹Akumou lalo wuchekeu lono ila khalo eno noye alo kehu oyezah ishikapiyelo.

³⁰Niye aghokulu shinikeu kisheluvae; niye owu kughakuthalo amlo tsuqhiyi ani.

³¹Niye nono kutsukeu pape cheni, O AMPEU ishikukujo kevilo.

³²Niye ozahkutsu gholuni keuno khekulhoke, kughengu nono ithikuthulu kepu itsu nani.

³³O AMPEU, oyezah kiqi pesu ishika piyelo, eno ado kumtsulo niye tipaqo ghokulu shini.

³⁴Oyezah chixechileyi ivilo pilo eno ino tipau gholunike; imlo kuchopu pesu tipau pechenike.

³⁵Ipelo ozahkutsuqo ghokulu shikepu shi qhilo, kughengu tipaqolo ilokivipu phulu cheni.

³⁶Akini-akua phunikeu nguno oyezah gholunikeuno ipulou shilupelo.

³⁷Ighenguno akivipu shiaghi namu nono piqhive ketoi ame kuhakeulo ilokumsu shipekevilo.

³⁸Ni, oqeu lau oshoqhi pualo, agholukemi lau tushoqhi chekeuhu.

³⁹Piputhakeu ino musa chekeu lono ixalulo; owu kughakuthaye akumzapuke!

⁴⁰Niye ozahkutsu gholunishike; akuxu kithe itsulo kughengu noye amikuchoke.

⁴¹AMPEU, noye khijehi ikimiye cheni keno ipiyelo, nono piqhivekeu kiqi lono ixalulo.

⁴²Tishiaye ipiputha akeqo niye khochilelu nani kughengu niye otsa pukhu acheni.

⁴³Ado kumtsulo kuchou tsa pikulupu shi ishikumtolo kughengu iwu lakujuye owu kughakutha shou ani.

⁴⁴Niye pulhapuju oyezah gholunike, alhokupuju kutolo.

⁴⁵Niye kuqhophekeu akiviu lono xunike kughengu niye okukutsu pape nike pukaputsa acheni.

⁴⁶Niye kukami vilo ozahkutsu pithiwo nani, eno niye kujovemoke.

⁴⁷Niye ozahkutsu gholu nikeuno ilokiqike kughengu ino tipaqo kimiye cheni.

⁴⁸Niye ozahkutsu gihu eno sumsa cheni; niye nono kutsukeu kumsukuto ani cheni.

⁴⁹Ni oqeu lau ashoqhi shikeu kumsululo, tipauno lajupu itsuke.

⁵⁰Ikusukinilo pimu niye alokughuno shiluke kughengu oshoqhino akuxu itsuke.

⁵¹Aqhekuzamino pulhapuju ithaigha acheni ikemu niye oyezah lono shothiu wumphike.

⁵²Kha-ghilo owu kughakutha hu niye kumsulu cheni, tipaqono alokughuno sughi cheni, O AMPEU.

⁵³Kixikilamino oyezah hexavekeu ino ithulukelo niye axuideve cheni.

⁵⁴Ayeghilo kuxu ikhonhei keu hipaulo niye ozahkutsu ghili ale iqiphe acheni.

⁵⁵Putholo niye okumsulu cheni, AMPEU, niye oyezah ghili kumsuju cheni.

⁵⁶Niye oyezah gholukeu lono ilokivi phulu cheni.

⁵⁷O AMEPU, niye olikhi lunishike; niye oyezah gholunikeu piqhike.

⁵⁸Ino imlo kuchopu pesu no iniju anike ikimiyekutulo nono piqhiveke toi!

⁵⁹Niye olaghi kumsukutoju eno okukutsu pape nikeushi ino piqhike.

⁶⁰Kumnumono niye mutazu ozahkutsu gholue.

⁶¹Kixikilamino ighenguno alichhe shipe qhike ikemu niye oyezah kumsumamoe.

⁶²Zubumtalo ghi niye ida ithughi puzu omikucho kughakutha ghenguno osheqheke.

⁶³Niye khunono oyezah ghokulu shini keno oqemi kumtsu sasu ashouke.

⁶⁴AMPEU, ayeghiye owu iqemokeu kikimiyeno chhitoi ani; ozahkutsuqo ishikapiyelo.

⁶⁵Noye oshoqhi puachenike, AMPEU nono ni oqeu lau alokeu shicheni.

⁶⁶Alokutsu ngo akighithi itsulo, kughengu niye ozahkutsu pukhu chenike.

⁶⁷Nono ighime mphi loye niye akumoulo wucheke ikemu itehi niye otsa ghokulu shi ani.

⁶⁸Noye kiutoi alokela! kiutoi kimiyekini kela! ozahkutsu ishikapiyelo.

⁶⁹Aqhekuzamino ighili pesu akimkitsa piani ikemu imlo kuchopu pesu okukutsu ghokulu shiani.

⁷⁰Timi hipaqoye vethakulu kuhake, ikemu niye oyezahlo ilokivipu sholu cheni.

⁷¹Ighimeqhi keuye ighenguno aloke, kughengu tino ipelo ozahkutsu shikalupeke.

⁷²Ayezah nono itsukeu huye ayeghiqhalo pisa akeu kumtsu nguno amekuauke.

⁷³Nono ilho eno ipelo akivishi anipeke; vethakulu itsulo, tishi anguno niye oyezah shikalunike.

⁷⁴Khunono ogihuni keno ni ithulu kelo alovi nani kughengu niye oshoqhi pukhu cheni.

⁷⁵Ino ithianike owu kughakuthaye achipiuke, AMPEU, nono ighimeqhi keuye noye amikuchoe.

⁷⁶Owu iqemokeu kikimiye pelo ilokughunotsu pelo nono oqeu vilo tushoqhive keu toi.

⁷⁷Ikimiyelo eno niye xulu nani kughengu niye oyezahlo alokiqi acheni.

⁷⁸Aqhekuzamino adou lono inguku akeulo shikukujovelo; ighenguye, niye okukutsulo kumsupuku anike.

⁷⁹Khunono ogihu cheni keno ilau ighipelo, azahkutsu ithiakemi kumtsu.

⁸⁰Ipelo thwokhalo ozahkutsu ghokulu shino tomlavekeu kukujo launo ngolupelo.

⁸¹O AMPEU, nono ixalunikeu khekeno niye lhovae; niye otsa shou pukhu ani.

⁸²Niye nono piqhivekeu khekeno inhethi qeyivae, ino iniju ani, “Noye kughono ilokughuno tsuni kya?”

⁸³Niye ajihughi avehupu shimoveno pevekeu toivae, ikeghi niye ozahkutsu kumsuma mphike.

⁸⁴Niye khitotohi khealo pi kya? Noye ishikimighikeqo kughono ghimeqhini kya?

⁸⁵Aqhekuzami, oyezah gholumo kemino imeluveniye aqoh chhupe puani.

⁸⁶Ozahkutsuye akuchopu amekuapuke; timino akimki lono ighimeqhi ani, ikuphulo!

⁸⁷Panonguno kitilano thono ipithiveni cheghi, ikemu niye ozahkutsu kughuchove mphike.

⁸⁸Owu iqemokeu kikimiye ghenguno ilau alokeu shilo, tishianguno niye oyezah ghokulu shilu nani.

⁸⁹O AMPEU, otsaye alhokupujulo ache nani; hiye kungughalo lhokta kuto anike.

⁹⁰Tiqheli kumtsulo omikuchoye haumokeuke; nono ayeghi pe pa-alo qhike eno tiye tishi acheni.

⁹¹Ozahkutsu ghenguno thwokha kumtsu ishi kutolo achepeke, kughengu panongu kumtsu oqemiqoke.

⁹²Oyezahno ilokivi khuki kumoke aye niye ighichhe ghime lono thive kepuake.

⁹³Niye khilemu nono kutsukeu kughuchovemoe kughengu tipaqo ghenguno nono ipuxupe qhike.

⁹⁴Niye owuke ixalulo! niye ozahkutsu gholu nike pukaputsa cheni.

⁹⁵Kixikilamino ipithive niye ikhe ani, ikemu niye oyezahlo kumsupukuni.

⁹⁶Thwokha kumtsu kihi kutha akeu ino shikaluvae; ikemu ozahkutsuye viwotoluke.

⁹⁷Niye oyezah shishe kimiye cheni! Atsala kupujulo niye tipau kumsu acheni.

⁹⁸Ozahkutsuye ado kumtsu igholo acheni, eno ighumi nguno ipelo alokutsuu shilu chenipeke.

⁹⁹Ikukutsumi kumtsu nguno alau ino vethalu cheni kughengu niye nono kutsukeu kumsujuke.

¹⁰⁰Alayemi nguno niye alokutsu alau ani kughengu ino ozahkutsu gholuke.

¹⁰¹Niye alhoksa ghushoghili kumtsu phevae kughengu niye otsa gholu nishike.

¹⁰²Niye nono kutsukeu kughuchove moe, kughengu no ampino ikukutsuuke.

¹⁰³Okukutsu michekuluye kiutoi ngoyini kya? tiye akhingozu nguno ngoyinike!

¹⁰⁴Niye oyezah lono alokutsu hesheluke, ikehu niye alomokeu ghushoghili kumtsu mithike!

¹⁰⁵Otsaye ila piyenikeu kulu lakhike, eno ilaghilo akuvu lakhike.

¹⁰⁶Ino okukutsu tsa kuchou gholu nikeu shi tsaquino tushoqhi keu peni cheni.

¹⁰⁷O AMPEU, ighichhe ghimeye ihuloke, nono piqhivekeu toi ipuxupe qhilo.

¹⁰⁸Iwu shikimthi kighini ikhilutsulo, AMPEU, eno ozahkutsu ishika piyelo.

¹⁰⁹Niye pulhapuju ikuxu avekusa shinikeu kutope ani, niye oyezah kumsumamoe.

¹¹⁰Kixikilamino alichhe shipesu izulo puani, ikemu niye ozahkutsu hebidemoke.

¹¹¹Ozahkutsuye lhokta kutolo imheghike; tipaqoye imlolo alokivi sughitsu chekeu.

¹¹²Ino thimoke tsala kutolo niye oyezah pape nikeu xathaluvae.

¹¹³Khunono thwokhalo oqhoqhu monikeno tipaqo ino mithi cheni, ikemu niye oyezah kimiye cheni.

¹¹⁴Noye ishokhalu eno ikheluve chekeu ke; niye oshoqhilo lajupu ani.

¹¹⁵Nongu axine shinishikemiqo, ilauno wuvelo, niye iLhou zahkutsu ghokulu shini.

¹¹⁶Nono piqhiveke toi akumto itsulo, O AMPEU eno niye xulu nani; ino laju akeu adou shivepe kevilo!

¹¹⁷Isunhepelo eno niye musakepu kuhake, niye pulhapuju ozahkutsulo amlo tsuqhiyinike.

¹¹⁸Oyezah hebidekemi kumtsu nono milive cheni; panonguno pishikiqhi muqu shikeuye adouke.

¹¹⁹Nono kixikilami kumtsu tubatuzu toi peitha cheni, ikehu niye okukutsu kimiye cheni.

¹²⁰Iphi ishino omsa kelauno khokhoshike; owu kughakutha ghenguno musakeuno ichhitoi ani.

¹²¹Kiuno achipi eno alokeno ino tipau shipuani; ighumi lau iphesu kevilo!

¹²²Oqeu kuphunikeu tushoqhivelo; inapughami pelo iqoda pekevilo!

¹²³Nono xalunikeu kukuphu kheju keno inhethiye qeivae, nono xaphelu nikeu piqhipua ke.

¹²⁴Owu iqemokeu kikimiye kiqi lono ipeithalo, ozahkutsu ishika tsulo.

¹²⁵Niye oqeuke, ithikuthulu kepu kighithi itsulo, tishianguno niye okukutsu ithi nani.

¹²⁶AMPEU, itehiye nono mlakepu do shivae, kughengu timino oyezah hebide achenike.

¹²⁷Niye shunayi nguno alau ozahkutsu kimiyeke, shunayi kivi nguno alau tipau kimiyeke.

¹²⁸ikehu niye okukutsu kumtsu papelu cheni; niye alakumo kumtsu mithike.

¹²⁹Okukutsuye akumzapuke; imlo kuchopu pesu tipaqo ghokulu shicheni.

¹³⁰Okukutsu chixechileyi pikeu lono akuvu tsucheni, mthakemi lau alokutsu sughi cheni.

¹³¹Ozahkutsu ghenguno ipulou akehu abaxa muku pesu khekulhoshike.

¹³²Ilau tsughu ighilo eno ikimiyelo, okimiyekemi kumtsu lau tishi cheke toi.

¹³³Nono piqhiveke toi ipelo ikiqive pekevilo; alhoksa pelo ivenha luve pekevilo.

¹³⁴Iqhasupe achekemi launo ixalulo, tishianguno niye ozahkutsu ghokulu shipenike.

¹³⁵Nono sachekeu gholono ikumghatsulo eno oyezah ishikalo.

¹³⁶Inhezuye aghoki toi qoiqighi ani, kughengu timino oyezah ghokulu shimoke.

¹³⁷Noye achipiuke, O AMPEU eno oyezahye achipike.

¹³⁸Nono tsukeu yeh huye thwokhalo achipiu eno aghibike.

¹³⁹Ighumino ozahkutsu phimo kehu ixukighideye ilolo ami toi iqu ani.

¹⁴⁰Nono piqhivekeuye mutsumisheyi keu! niye tipau kupu cheni!

¹⁴¹Niye akhotomi kumo eno jupi chevekemike ikemu niye okukutsu kughuchovemoe.

¹⁴²Omikuchoye alhokupuju ache nani, eno oyezahye pulhapuju kuchou.

¹⁴³Niye shiluksa eno amlo kutakihi keuno chhitoi ani ikemu ozahkutsuno ilopivi tsuke.

¹⁴⁴Okukutsuye pulhapujulo achipike, vethakulu itsulo eno niye xulu nani.

¹⁴⁵Imlo kuchopu pesu oku ani; O AMPEU, ikhochilelo eno niye ozahkutsu gholuni!

¹⁴⁶Ino oku ani, ixalulo eno niye oyezah pelu nanike.

¹⁴⁷Tsukinhe ipeghi mphilo kuphu peniye ino oku; niye oshoqhilo iwu lakuju be ani.

¹⁴⁸Puthotsu niye zuhumono ae, okukutsulo kumsupuku ake.

¹⁴⁹Owu kikimiye iqemokeu ghenguno ikighini initsulo, O AMPEU; Okikimiye ipiyelo eno ikuxu pukhalulo!

¹⁵⁰Ayikusashi ighime chekeqo ipunu ighivae, oyezah khilemu pechemo kemi timiqoke.

¹⁵¹Ikemu noye ikupunu ani, AMPEU, ozahkutsu kumtsu iqemokeuke.

¹⁵²Khaghino niye okukutsu shikalu vea; nono tipaqo pelo alhokupujulo achenipeke.

¹⁵³Ighichheghime jutsulo eno ixalulo, kughengu niye oyezah kughuchove moke.

¹⁵⁴Ino kiulo anikeno tipau ghenguno pilo eno ikuqhophevelo; ixalulo nono piqhivekeu toi.

¹⁵⁵Kixikilamiye xalumo nani kughengu panonguye oyezah gholumoe.

¹⁵⁶Ikemu nono qhuivulakeuye kijeke, AMPEU, okukupu piyelo eno ixalulo!

¹⁵⁷Niye aghumi ngo inedaqodakemi kutomo ani, ikemu niye oyezah ghobidekeu shipuamoe.

¹⁵⁸Ino hu puxakidemiqo juaye imlo kishikumono chhitoive ani, kughengu panonguye ozahkutsu pelumoke.

¹⁵⁹Niye kishi okukutsu kimiye cheni keno julo, AMPEU, okikimiye ye khilemu kilivemoe ike ixalulo!

¹⁶⁰Oyezah lothiye kuchouke, eno owu achipiu kughakuthaye lhokta kutoke!

¹⁶¹Akuka peithakemino akumou lono ihale ani, ikemu niye oyezah gihu acheni.

¹⁶²Oshoqhi ghenguno niye alokivishi acheni, timino akinikhuki phulukelo lokivi toike.

¹⁶³Niye akimki jeli mithi eno junishi moe, ikemu niye oyezah kimiye cheni.

¹⁶⁴Nono achipiu lono kughathakeu ghenguno atsalalo ghuthu tsuni oshikimthi cheni.

¹⁶⁵Oyezah kimiyekemiye sushokulu kuchou ani, kiunomu panoqo pelo iluqive pemlake.

¹⁶⁶Niye opelo ixalupe nike kheani, AMPEU, nono ahza tsukeu ino shicheni.

¹⁶⁷Okukutsu ino aghokulu shicheni; imlo kuchopu pesu tipaqo kimiye cheni.

¹⁶⁸Niye ozahkutsu ngo okukutsuqo aghokulu shicheni, ino shikeu kumtsu nono ithulue.

¹⁶⁹Kuphupenike ino ighakeu hu otopelo, AMPEU! nono tushoqhiveke toi ithikuta shikepu kighithi itsulo.

¹⁷⁰Ikighini initsulo eno oshoqhi kiqi hutoi ixalulo!

¹⁷¹Niye pulhapuju osheqheni, kughengu nono oyezah ishikapiyeke.

¹⁷²Niye oyezah shipilini, kughengu ozahkutsuye achipiuke.

¹⁷³Pulhapuju ikuphuni keu kutopealo, kughengu niye ozahkutsu papelu cheni.

¹⁷⁴Nono xalukeu kukuphu khitohi ino khe acheni kya? O AMPEU! niye oyezahlo alokivi phuluke,

¹⁷⁵Akuxu itsulo, tishianguno niye osheqhenike; okukutsuno ikuphu pelo,

¹⁷⁶Niye puhavekeu bheri toi itsu cheni, iphu ighilo, ni oqeu, kughengu niye oyezahqo kughuchovemoke.