Read Sumi Naga LESHELE 132 Bible Online

LESHELE 132 - Sumi Naga bible

LESHELE 132

¹O AMPEU, David lau kumsuju keu atsulo, eno pano shiluksa lo kutuukeu kumtsu ithitsulo.

²Pano piqhivekeu eno olau kiu shiniepi tushoqhi kela tipau kumsulu tsulo, Jakob Lhou Akughushuu:

³“Niye ikilo ilomoe momu izu-a damoni;

⁴Niye akulho qhimoni momu zuhu moni.

⁵Ino AMPEU ghenguno ngokepu-a lakhi kutotsuni, Jakob Lhou Akughushuu ghenguno ngokepu ki lakhi kutotsu moke kutolo tishi ani.”

⁶Bethlehem lo ninguno Pulosoqhi Bohu ghili chilu, ninguno Jearim luqa lono tipau phuluke.

⁷Ninguno pike, “Ningu AMPEU kilo wuni nolo; ningu pa kuka lakhu zulono mllanike.”

⁸Ithulo, O AMPEU, nono ngoche keu-alo ighilo, Puloshoqhi Bohu, okuka-kumto michipu gholo ighino alhokupuju hile ngolo.

⁹Ochinetomi pelo pulhapuju achipiu pepu pelo; eno owu timiqo pelo alokivi launo ighamuku pelo!

¹⁰Nono oqeu David lau tushoqhipe puani kehu nono kisheluvekeu akukau milive kevilo, AMPEU.

¹¹Nono tsaquikeu shoqhi lakhi David lau piqhi puani, tipau shoqhi noye ikhichilevemo nani: “Onuliqo gholo milakhi pelo akukau shipe nani, pano othiu ayehpe nani.

¹²Onuliqono iwu puloshoqhi pelu aye, eno ino ahza tsukeu panoqono pelu aye pano nuliqo ghi pulhapujulo opapesu akukau shi-ghi oqhusulu nani.”

¹³AMPEU no Zion kisheluke; tipau pesu pano ngochekeu-ki shinishike;

¹⁴“Hiye alhokupujulo ino ngochekeu-a ke; ino hilehi ngono ayehpeni shicheni.

¹⁵Ino kupukunoshi Zion kumghatsuni eno li vehupu kumtsu kutotsuni, tilehi kumlhomi akeqo ino achuqupu pesu aghapiqi tsuni.

¹⁶Tilehi achinemiye ino xakulupu pepipe nani eno Alhou wu timiqono alokivi launo ighamuku alephe nani.

¹⁷Tipaulo David laghami gholo milakhi pelo ino akukau kije lakhi shipe nani, hileno ino kisheluvekeu ghenguno akulu lakhi kutope puatsu ake.

¹⁸Pa ghumiye ino akukujo xapipe nani, ikemu pa kukaqhaye kinikulu shi nani eno pekhowolu anani.”