Read Sumi Naga LESHELE 144 Bible Online

LESHELE 144 - Sumi Naga bible

LESHELE 144

¹Isushokuluu, AMPEU she qhelo! pano aghukishi ghenguno iqopheke eno aghushi penike ipelo kutokupuilu peke.

²Paye isushokuluu eno ino ihje luchekeu, ino itshulu chekeu eno ixakuluu, ino ihjelunike pa pukhu chekeuke. Pano ashiayehqo iqholo hasughi cheni.

³AMPEU, timiye kiukeno noye pa heju cheni; timi keno kuu noye pa lau amlo tsuqhiyi cheni kya?

⁴Timiye atuthu lakhi toike; pa kuxu tsalaye wuve chekeu yekukhu lakhi toike.

⁵Atsutsu kiyeveno aqhou iqighilo, AMPEU; Naghutoqo bujulo eno tipaqono amchhi phoipeghi nani.

⁶Tsutsupha kulo puwulo eno oghumiqo halelo; opiji kapuwulo eno panoqoye shekoha nani.

⁷Kunguuno o-u chhopiqilo, azu kutho lono ixaphelulo; Inaghami kuka-kumto launo ixalulo,

⁸Panoqoye khilemu kuchou pichemoe eno tushoqhi akeloghi miki chenike.

⁹Ino ale kithe lakhi oghenguno phe tsuni, O Alhou; ino akighilebo igha ghi oshipilini.

¹⁰Nono kukamiqo tokulu tsucheni eno oqeu David xaphe luke.

¹¹Ighumi ayikusaqo launo ixalulo; Inaghami kuka kumto launo ixa phelulo, panoqoye khilemu kuchou pichemoe eno tushoqhi akeloghi miki chenike.

¹²Ni nuliqo pelo pano lhothelo mutotoi thuwulu akeu subo toilu pelo. Ningaqo pelo qhemghaikeu tsukuchono akighiki phelo jukighile pushi akeu toilu pelo.

¹³Ni bi-ale pelo tuxa-tini jelino chhitoilu pelo. Niluqalo bheriqo pelo qhethonheno qhethonhe kutolo piti kighishelu pelo.

¹⁴Ni tsu-aqu pelo ati-ijovemo momu piti-kighishelu pelo. Ni phuyina laghilalo ichhe imekeu ghugha kuha pelo.

¹⁵Khunoqo shou hikithipu kukumgha ikughini keno tipano lokivipuke; khuno Lhouno AMPEU keno tipano lokivipue!