Read Sumi Naga LESHELE 147 Bible Online

LESHELE 147 - Sumi Naga bible

LESHELE 147

¹AMPEU sheqhelo! shipili sheqhe pesu niLhou tsukeuye aloke; pa shipilikeu hiye achipike.

²AMPEU no Jerusalem shikithepuku ani; paye hapiyepighive keqo sachile saghi ani.

³Pano amlo ipopinyive kemiqo shipivi eno panongu zaku khavetsu.

⁴Pano ayepu khije akepukeno kihithatsu eno ayepu lakhikhi aje ku-ghi kucheni.

⁵AMPEU ye kije eno akughushuu; pa lokutsuye mighiwo tomlae.

⁶Pano aqhokighemi tuqhepuku cheni, ikemu kixikilami ayeghilo chundave cheni.

⁷AMPEU lau sheqhekeu le phelo; niLhou lau akighilebo pesu alejo kuighalo.

⁸Pano atsutsulo khungkusu qhawo cheni; ayeghi ghenguno tsutsughu piqi eno atoghilo asutsuni thwulupe cheni.

⁹Pano tughashi tikishi achuqupu tsucheni eno kughou aghatino igha kukelo loji cheni.

¹⁰Pa zukuvuye khurshi kumtolo anike kumoe, momu amlo kumto ghushimi shou pa lokiqi achemoe;

¹¹ikemu khunono pa gihu cheni keno tipano shou pa zukuvu ani, tiye pawu iqemokeu kikimiye pukhukemi shou ani.

¹²AMPEU sheqhelo, O Jerusalem! OLhou sheqhelo, O Zion!

¹³Pano oliwo kikha mutotoipe qhitsu; pano owu timiqo kumghatsu.

¹⁴Pano noyeghi lughi kupunamono qhitsu eno athi aghileu pesu ogha piqitsuke.

¹⁵Pano ayeghi vilo ahza lakhi tsu, eno pano kiu pikeno papashi shiqhive.

¹⁶Pano amhiphi toi murasu qhae eno ayeghi mukhu toi avutsa veleke.

¹⁷Pano atumlo toi apughu puwue; pano akumko puwukelo khunomu ngosumlae!

¹⁸Tileno pano ahza tsu kelo murasuno azu ilhove; pano amlhu puwu eno azuno qowuke.

¹⁹Pano pawu timi lau pa sutsa tsu, pa kukutsu eno ayezahqo Israil lau tsuke.

²⁰Paye ashiayeh kutami ghenguye hipau shipuamoe; panoqoye pa yezah mthake. AMPEU sheqhelo!