Read Sumi Naga LESHELE 17 Bible Online

LESHELE 17 - Sumi Naga bible

LESHELE 17

¹[15] O AMPEU, achipiu xathatsu penishi keu tsa initsulo, kuphu penike ino ighamuku akeu iniju tsulo! Mikimokeu kichi lono ino inikhukeu inijutsulo.

²Olauno isaphukeu ighipelo kughengu nono achipiu ithulu anike.

³Nono imlo pu-juvae, nono putholo ixuju ighivae, nono ipejuveake, ilolo alhoksa kukumsu kuhakeu nono ithi anie.

⁴Kutami toi ikichilo ye akipimi tsa pichemoe. Otsa luno niye heqhi-buqhikeu laghi pulamoe.

⁵Olaghilo ipukhune mutotoi nepe acheni eno tipau lono nekipheve mphie.

⁶Ino ovilo ighamuku khue, O Alhou,Kughengu nono ikhochiletsu cheni, Ike okini ilau kughopuwo tsulo, isutsa initsulo.

⁷Owu akichiqhi kepu kikimiye kuchou hu pephepiyelo, aghumi launo susholu peniye olau ijeh ighikemiqo xaluchekeu-o!

⁸Onhekiyighi shi ijukuto tsulo, kixikilamino ishipusaniye akeulo. Akithipu ghumi no suhope iha akeulo, ochishibo yekukhu qholo ikughutshuvelo.

¹⁰Panonguye amlo ighiqhiyikeu kuhano aqhekuza-kulaki tsa picheni.

¹¹Panonguno iha cheni, itehiye isuhope ani, isunhe kuluqhi veniye anhethi pilepe iju ani.

¹²Panonguye abongushu toi isutha pinyive nishi ani, abongushu lhothe toi alachepe khe ani.

¹³Ilhethulo, AMPEU, ighumi mujochi leno panoqo leluvelo! Ozutakihi pesu kixikilami launo ikuxu xapheluvetsulo.

¹⁴Ayeghi hipaulo khunono lunishikeu pighi cheni keno tipaqo launo ixaphelo, O AMPEU, Nono panoqo ghenguno aghimepu kutopuakeu pesu panongu ghimeqhilo, pano tianuli ghenguno lukumkhashi kutotsulo eno pano tianuliqo wu atianuli shou ghi kuto tsulo!

¹⁵Ighenguye amikucho shi ino ogi ithulu nani, ino idathughi kelo oju kimihi jupesu ilokivishi nani.