Read Sumi Naga LESHELE 18 Bible Online

LESHELE 18 - Sumi Naga bible

LESHELE 18

¹[16] O AMPEU, ino okimiye cheni! Noye isushokuluu.

²AMPEU ye ituqu iliwo, ixaphekuluu, iLhou ye ituqu, pano isusholu cheni. Paye izuto, ixakulupu kuka eno ikumto-a.

³Ino ighamuku AMPEU vilo pikelo pano ighumi kumtsu launo ixalu, AMPEU sheqhe kuzupuke.

⁴Akithi kumsapuno isuholuve, shikupsa kighideno ishou ilu-ikughive.

⁵Akithi-gha kumsapuno isuholuve, Akithi lichheno isasu kushoe.

⁶Ivekusa launo ino AMPEU vilo ighamuku; iLhou pelo kuphupe nike ighae. Pa chineki lono pano isutsa chilu; ino kuphupe nike ighakeu pano initsue.

⁷Tile ayeghino khokhoshi ithae; Naghuto boqha ghi sukughutha eno ilue, kughengu Alhou no axu-ideveke.

⁸Pa nigipe lono amichhi pho iqighi, pa kichi lono muhakeu mi-mili eno iquakeu miyi ipeghi.

⁹Pano atsutsu suxuveno iqighi, akuzu-kutho no pa pukhu qholo ae.

¹⁰Paye kerubim shou ikuno yewu; paye amlhu chishibo shouno yewue.

¹¹Paye akuzu-kutho pesu pa kuzupue, zuchiyikeu khungkusu, azu chhitoi keuno pa kuzupue.

¹²Pa zulo tsutsu-pha akeu lono apughu ngo ami tsutsupha ighi eno pawu khungkusu chhethae.

¹³Tile AMPEU no kungugha lono tsutsu-sue eno shishe Akiqheu sutsa chilue.

¹⁴Pano pa piji kapuwu eno pa ghumi hapiyepighive; tsutsupha kukulo pesu panoqo haleve.

¹⁵O AMPEU, nono ighumi vilo alomi pikelo eno aloghu lono panoqo vilo ighakelo, azughi boqha ithulu puqaive, ayeghi boqhaqo hu vezaleyiveke.

¹⁶AMPEU no kunguuno itsaiqi puzu ikhapeluve; pano azu-kuthoqo lono isunhepheluve.

¹⁷Ighumi akumtomi launo eno imithi chekemi launo AMPEU no ixaphelu, kughengu ighenguno panoqoye akumto kutsasake.

¹⁸Ino shilusa ake lono panonguno ishou ikughi, ikemu AMPEU no suqheluve.

¹⁹Pano aghuche kivilo isapeghive, pano ixapheluve kughengu pano iju aloqi cheni.

²⁰AMPEU no asaxu itsue kughengu kiuno achipiu keno tipau ino shi acheni. Iu kimithe jume pano ikumghatsue.

²¹Kughengu AMPEU yezah ino pelu cheni, eno iLhou gholumono wuve chemoe.

²²Kughengu pano shilo-pi keu yezah kumtsu ino shi cheni; eno pawu yepe-puakeu niye pa yezah peve chemoe.

²³Niye pa zulo akumzu kuxu xucheni, eno kuquve nosake launo ino kutokupui acheni.

²⁴Ino achipiu shikeu kiqi lono AMPEU no ijume tsue, kughengu pa zulo i-u mithemitheyi keu anike.

²⁵Pukhubekulumi lau noye pukhu bekulu shicheni, O AMPEU; Akumzumi lau noye akumzu shicheni;

²⁶Akimthemi lau noye akimtheshi cheni, ikemu chighichilai kemi lau noye sakughuzu cheni.

²⁷AMPEU noye aqhokighemi xalu cheni, ikemu tsutsungo jukemiye nono sunheqhive cheni.

²⁸O AMPEU, nono ikulu yepuvulupeke, iLhou, nono ikuzu yepuvu tsue.

²⁹Nono akumto itsu no ighumi lewupe, iLhou gholono aghutu ilhechelue.

³⁰Alhou laghiye kupukulaike, AMPEU no piqhivekeu tsaye kuchouke. Khunono pa launo sukusho lucheni keno tipaqo ghenguno paye azuto lakhi toike.

³¹AMPEU no Alhou kethono khuuno Alhou kya? NiLhou no atuqu kethono khuuno atuqu kya?

³²Pano ishikumtotsu chekeu Lhou ke, eno ilaghi muzuchoyi shitsuche keu.

³³Ashe pukhu toi ipukhune suqhe keulo pano ipelo tsaqui nelupeke, naghuto kutsuqalo pano nipe tsaqui qhike.

³⁴Aghushi ghili Alhou no ishikaputhu, ikehu iuno ayi suzu sukuholue.

³⁵AMPEU, nono xakulupu zuto pesu itsue, okuka-kumtono imutu peke, Okukuphuno ipelo kije shipe.

³⁶Nono ila ililayi shitsuno ipukhu nekiphe pemoe.

³⁷Ino ighumi hawuno panoqo kughalu, panoqo kutsakhave moke kutolo xachile ide ighimoe.

³⁸Ino panoqo ghuzave kehu panonguye idethughimoe; panonguye ipukhu phivilo iluqi.

³⁹Aghushi nanu kumto pesu nono ixapipe; ishou ikughikemiqo nono iqhou sunhe-kuluqhi.

⁴⁰Nono ighumi pelo ilauno kohavepe; imithichekemi ino kutsapinyive,

⁴¹Panongu kuphulepi ighamuku ikemu khunomu panoqo xamla, panonguno AMPEU lau ighamuku ikemu paye panoqo khochilemoe.

⁴²Ino panongu munuqhi pe amlhuno fupewuve chekeu mukhu toi. Alaghila lono aniba toi ino panoqo nedaqoda.

⁴³Timiqono kusuxakeu lono nono ixapheluve, nono ipelo shiyehqo shou ayehkipeu shipe; ino mthano achekemi timiqo pelo iqepe.

⁴⁴Inaghamino izulo itsa-iqi tsu; ighili panongu tokelo panonguno agholue.

⁴⁵Inaghamino pano mlo hauve, eno pano liwo lono msa khokhoshi ighi.

⁴⁶AMPEU ye xuani! Ituqu shipililo, Ixakulu Lhou suqhelo.

⁴⁷Alhou no imukhu lutsuke eno shiyehqo iqholo hasaghi tsuke;

⁴⁸ighumiqo launo ixapheluveke. O AMPEU, nono ighumi shou tokulu shilupeke eno heqhi-buqhikemi launo ni ikhipheluveke.

⁴⁹Tighenguno shiyehqo gholo ino oje pipitsuni eno oje shipilini.

⁵⁰Alhou no tokulu kije pesu pa kukau tsuke; iqemokeu kikimiye pesu pano nukishe luvekeu lau piyeke, tiye David eno pa tikughukomi lau alhokupuju ghenguno piyeke.