Read Sumi Naga LESHELE 19 Bible Online

LESHELE 19 - Sumi Naga bible

LESHELE 19

¹[17] Kungughano Alhou kimthe-jukuvu mutsumisheyi piye ani; Atsutsuno pauno mlakeu asheshu tsu ani.

²Atsala lakhi lono ighinikeu tsala kutolo piputo ani, putho lakhino lakhiu kutolo akighithi lephe ani.

³Atsapi kuha, atsamu peithamoe, panoqo ghughamu chimlae.

⁴Ikeghi panongu sutsaye ayeghiqha kumtsulo wu cheni, eno panongu tsaye ayeghi shekha kutolo wu acheni. Alhou no atsutsulo tsukinhe ghenguno akungoki lakhi shipuani.

⁵Kulapuuno pa chebo lono ipeke toi tipauno ipeghi acheni, asachumi lakhino pokuxuniye alovi ake toi acheni.

⁶Hiye atsutsu aku lakhi lono ipeghi eno tipa shekha kutolo homuxae; eno kiumu tipau kushu launo itshuvemlae.

⁷AMPEU yezah ye kupukulayike, tino aghuthi puxutsu cheni. AMPEU no shilo pikeu yezah ye achipi, alokutsu kuhakemi pelo tsukhuilu chenipe.

⁸AMPEU no shilopikeqo yezah ye achipi, tipaqo gholukemi mlo lopivitsu cheni. AMPEU zahkutsuye mithemitheyi anhethi tsughukhuyi shitsu cheni.

⁹AMPEU sumsakeuye aloe; tiye alhokupujulo ache nani. AMPEU wu kughakuthaye achipi; tiye thwokhalo achipi ke.

¹⁰Shunayi akiviu nguno alau tipaqo hekepuke; Akhingozu akiviu nguno tipaqouno ngoyinike.

¹¹Tinguno alauno, tipaqono ni oqeu ghutu tsu cheni; tipaqo pelukeulo ajume kije ani.

¹²Khunomu alikhi akipimi ithulu chemoe? tuqho-tughou kipimi lono ixaphelulo, AMPEU!

¹³Ghoshixu xine launo isunhechilelo, tipaqo xine pelo iqaqhipe kevilo! tishiaye niye tichetighepu shimo nani eno niye kupukulayi nani.

¹⁴ikichilo piqhikeu eno imlolo kumsu keu ozulo ikhikulupu shipelo, O AMPEU, ituqu eno ixachilekuluu.