Read Sumi Naga LESHELE 22 Bible Online

LESHELE 22 - Sumi Naga bible

LESHELE 22

¹[20] ILhou, iLhou, noye kushiye iqhive ani kya? ikuphupe nikeu ighamuku aghimeshi akeu lo noye kushiye putosu auve akya?

²O iLhou, pucho tsalalo ino ighakemu noye ikhochilemoe; Putho lono igha ikemu niye akulho kiqhi ithumlae.

³Ikemu noye Akimtheu shi akuka lakhulo iqa akeu, Israilmino akishe tsuche keuke.

⁴Nipuasuno oshou pukhu che, panonguno opukhubeke eno nono panoqo xaphelue.

⁵Panonguno ighamuku okue eno akumsapu lono pokawuluve, Panonguno opukhubeke eno noye panoqo lokumtshu vemoe.

⁶Ikemu niye timi kumo toivae, niye pithe ninga lakhi shiavuvae, kutamino ithaigha eno ijukunatha auvae!

⁷Ijuthulukemi kumtsuno ithaigha, Panonguno amtsu yelepe itsu eno tishitsulo pi akutsu kungu tsu.

⁸Panonguno pi, “Noye AMPEU pukhube achenike paye kushiye oxapheluve mokya? AMPEU no oju alocheni aye paye kushiye okuphu luvemo kya?”

⁹O AMPEU, ipunukelo ghi nono ihejulue, ino anga kughunu shi akelo nono isusho pe qhike.

¹⁰Ipunuke tsala lono oshou pukhube acheke, Iza polo aphi lonomu noye iLhouke.

¹¹Ilauno putosuwuve kevilo, kughengu shiluksano ikupunupe anie, eno khumu ikhuphunikemi kuhae!

¹²Aghumi kumzapuno amshitsu toi isuhope ani, Bashan yeghilo ayiksa mishitsuqo toi panonguno isuhope ani.

¹³Abongushuno muqhumuza igha aketoi aghumiqono panoqo baxa muku pesu itsu anie.

¹⁴Ayeghilo azu leqhiveke toi ikumtoye hauvae, Ighi anhu kumtsu ita-kututa shivae; Imloye aghugha mullaveke toivae.

¹⁵Ikughokiye alitsa toi kishiqhaivae; eno imiliye ataha medaluvae. AMPEU, nono ipelo thivepe niaye ayeghi mukhulo iqhivae.

¹⁶Atsu lojino suhope akeshi kusakughami muqono isuho pesu ani; Panonguno i-u ngo ipukhu qhuxutsuke[21]

¹⁷Ighi kumtsu kihikhaluve ani, Ighumino anhethi sukuqumono iju ani;

¹⁸Panoqo dolono iphimini kijelu veniye asaqhi eno panonguno iphinhemgha kijeluve.

¹⁹Ikemu, O AMPEU, noye ilauno putosu kevilo! ikukuphuu, mtazu ixaphelulo!

²⁰Azutakihi lono ikuxu xaphelutsulo, atsu loji lono ixaphelo.

²¹Abongushu baxa lono ixalulo, aghalo mshitsu zulo niye ithamlavae![22]

²²Ithikuzumiqo gholo ino oje piphetsuni, panoqo hoholo ino osheqheni.

²³Nongu AMPEU sumsachekeqo, pa shipililo, Nongu Jakob laghami kumtsu pa kimtheje pipilo; Nongu Israil laghamiqo, pa mlla gihulo.

²⁴Kughengu paye kumlhomi mithive chemoe, momu panoqo ghime jupe aphimuqhu chemoe; Pagi panoqo launo kusuluve chemoe, ikemu panonguno kuphu lepi igha kukelo initsu cheni.

²⁵Nono ilau shitsukeqo ghenguno ino ahoho kije lono osheqheni cheni, Osumsa omllachekemi zulo ino ashoqhi shipuakeu toi aghashipe omllani.

²⁶Kumlhomino aghakiqishi chulu nani, Khunono AMPEU lau ighini keno pa mllalu nani. Panongu pelo alhokupuju kinikulu shilupeniu!

²⁷Timi jeli kumtsuno AMPEU kumsulu nani eno pa lau xaideghi nani; Ashiayeh jeli kumtsuno pa gihu mlla nani.

²⁸Ayehkipeqhaye AMPEU wuke, eno pano shiyeh kumtsu shou ayehpe ani.

²⁹Ayeghilo aqhekuzami kumtsu pa zulo itsaiqi gihu nani, Thiveni kemi kumtsu pa zulo itsaiqi gihu nani.

³⁰Timiqono ighinikeu tiqhelimi vilo AMPEU ghili pi nani.

³¹Punu mphi kemiqo vilo ghi, “AMPEU no pawu timiye xalue, ipi piwo nani.”