Read Sumi Naga LESHELE 25 Bible Online

LESHELE 25 - Sumi Naga bible

LESHELE 25

¹[26] O AMPEU, olau ikighini peighi ani.

²ILhou, olauno ikupukhu anike, Ighumi pelo iphimo gihumo pekevilo, eno ipelo kujo mzave pekevilo!

³Opukhu chekemi ye kujove chemoe, ikemu khunono mighimghai omjochile cheni keno tipaqo pelo kujove pelo.

⁴Olaghi ipelo ithipelo, O AMPEU; olaghi ishika tsulo.

⁵Owu kuchou ghola lono xulupenike ishika piyelo, kughengu noye ixaluchekeu Lhou ke; Atsala kupuju ino ngo okhe acheni.

⁶Nono kupuchekeu atho shi kimiyechekeu kumsululo, O AMPEU, kughengu tiye khaghino tishi cheghike.

⁷Ilhothelo xineqo ngo ino kuquve keu xine kumsumave tsulo, ow iqemokeu kikimiye kiqi lono ikumsululo, O AMPEU!

⁸AMPEU ye alo eno amikuchoe tighenguno pano axinemi lau pa laghi shika piye cheni.

⁹Pano ala achipiulo aqhokighemi sawu cheni, eno panoqo vilo pa laghi shika piye cheni.

¹⁰Khunoqono AMPEU wu puloshoqhi eno pa kuxu shepe pelu cheni keno, panoqo ghenguno AMPEU laghiqoye iqemokeu kikimiye eno pukhube kulu shi cheni.

¹¹O AMPEU, nono piqhivekeu toi ixine kutomo akeu pevetsulo.

¹²Timi khunono AMPEU sumsa cheni keno pano panonguno pula kepu laghi kishetsu cheni.

¹³Panonguye pulhapuju kinikulu shi nani eno pano tianulino ayeghi pighimi shiluve nani.

¹⁴Khunono AMPEU sumsa cheni keno paye AMPEU shompami ke, tipanoqo lau pano puloshoqhi pesu pitsu cheni.

¹⁵Inhethiye pulhapuju AMPEU laujuani, kughengu pano akuighupu lono isunhe phetsu nani.

¹⁶AMPEU, ilau tsughu ighino ikimiyetsulo; kughengu niye ilikhivae eno ishikighime ani.

¹⁷Imlolo kupuna akeu ghuluvetsulo eno iwu shiluksa lono ni ikhipheluvelo.

¹⁸Iwu shiluksa eno aghime shiakeu kumsujutsulo, ixine kumtsu pevetsulo.

¹⁹Ighumi khijejehi ani keno kumsujulo, eno panonguno ayikusashi imithi cheni.

²⁰Ikuxu susholu eno ixaphetsulo; eno niye no ijepe anike ghenguno ipelo kujove pekevilo.

²¹Imikucho eno ikivi ghenguno ikhekutolu pelo, kughengu niye okhe ani.

²²O Alhou, shiluksa kumtsu lono owu timi Israilmi xachile lulo.