Read Sumi Naga LESHELE 27 Bible Online

LESHELE 27 - Sumi Naga bible

LESHELE 27

¹[28] AMPEU ye ikuvu eno ixakulupu, niye khuu musani kya? AMPEU no ikughutshua niye khuu musakepu ani kya?

²Kughono alhoksamino iha-ighi eno ipithiveniye pukaputsa keno, ighumi eno imithichekeqoye kupuxape iluqive nani.

³Ghushimi kumzapuno isuhope ngoluve namu niye khilemu msa ichivemo nani; Isasu aghu shi ipeghive namu niye Alhou pukhube anani.

⁴AMPEU vilo ino kiukela lakhi khuani, tipau likhi ino phu anani; Tiye ikuxu kupuju AMPEU kilo xuache nikeu, AMPEU ye kiu toi akivi kela qheghuyi ju anikeu, eno pa chinekilo ikichepiye penike iniju ani cheni.

⁵Shiluksa tsalalo pano isushope kusuluve nani; Pa chineki qholo pano ipesu kusuluve nani; eno atuqu qhemghai keu shou pano ipe qhive nani.

⁶Ighumi isuhope akeqo shou ikutsu peqhelu nani, Alokivishi asheshuno pa chinekilo aghashi pe mlla nani. Ino alephe, AMPEU sheqhe nani.

⁷Ino ovilo ighamuku kelo isutsa initsulo, AMPEU; ikimiyekutulo eno ikhochiletsulo!

⁸Nono, “Ighieno imllalo” ipikelo, imlo lono ishi okhochile, “Ino ophusu olau cheni.

⁹Ilauno ogi kusuluve kevilo!” Omlo kighide lono ni oqeu hapu wove kevilo, noye ikuphu chekeuke. Iqhive kevilo, ipheve kevilo, O Alhou, ixakuluu!

¹⁰Ipu ngo iza ghi iqhiveluvi, ikemu AMPEU no ihejuluve nani.

¹¹O AMPEU, ipelo kiu shipe nishi anikeno ishika piyelo, eno ala kumzulo isasu wulo kughengu ighumi kutomo ani.

¹²Ighumiqo puloulo iqhive kevilo, kughengu akimki ngo shikichikeu pesu ishou ikughi ani.

¹³Ino pulu anike niye ayeghilo xuaphi lono AMPEU no akivi tsukeu ithulu nani.

¹⁴AMPEU pukhulo, mutotoi alo eno amlo kuloghi shilo. Iye, AMPEU pukhulo.