Read Sumi Naga LESHELE 28 Bible Online

LESHELE 28 - Sumi Naga bible

LESHELE 28

¹[29] O AMPEU, ino oku ani, Isushokuluu, ilauno akini ipo phoyi auve kevilo; Nono inaqhoi auve aye niye Kithi ghalo iqivekemi gholo lakhi shive nani.

²Ino i-u peqhe pesu okimthe chineki kudau ighino ikuphupeniye qhuiniju akeu sutsa chilutsulo.

³Timi lhoksami gholo ipeve kevilo, alhoksa kumlami gholo timi tipa qono akusami vilo shompami toi putsa cheni, ikemu pano mlolo axekusu pucheni.

⁴Pano kumla qhemi lono panongu lochiletsulo, panongu lhoksa kumla qhemi tsulo; Panongu uno kiu mlakeno tipa qhemi lochiletsulo, Panonguno ithulu kuzupu shiakeu pesu panoqo tsulo.

⁵Panonguye AMPEU no shipuakeu ithi chemoke, momu pauno mlapuakeu ithiamoe; Ikehu pano panoqo ghimeqhi nani eno khilemu panoqo suqhepukumo nani.

⁶AMPEU lau sheqhekeu tsulo; kughengu ikuphupeniye ino qhuinijukeu sutsa pano chilutsuke.

⁷AMPEU ye ikumto eno izuto, pa lau ino pukhube cheni. Tighenguno pano ikuphutsu eno ilopivitsuke, eno ino alokivi le phepesu pa shikimthitsu cheni.

⁸AMPEU ye pawu timiqo shikumto kutsuue, pano nukishelukeu kukau susholu eno xalu cheni,

⁹Owu timiqo xalutsulo eno omhe ghimi kumghatsulo O AMPEU. Nono panoqo kheu shitsulo eno alhokupujulo panoqo hejulo.