Read Sumi Naga LESHELE 30 Bible Online

LESHELE 30 - Sumi Naga bible

LESHELE 30

¹[32] Ino osheqhe ani O AMPEU, kughengu nono ixapheluke, eno nono ighumi pelo ijupe alovive pemoe.

²O AMPEU iLhou, ino ovilo ikuphu lopi ighamuku kelo nono ishipivi tsu;

³AMPEU akumo lono nono ixaputhulue, eno kithighalo iqichekemi gholono nono ikuxu xuchilelupe.

⁴AMPEU sheqhe alephelo, O nongu pa ghokulumiqo, Akimtheu kumla kumsulu ghi shikimthi tsulo!

⁵Pa mlo kighideye ikhonhei ke do ghengunoke, eno pano alokeuye akuxu kupuju ghengunoke. Putholo anhezu piji aghiluvi, ikemu inaqheye alovi ighi cheni,

⁶Ino kinikulu shiakelo ilikhi ivilo ishi pi, “Khilemu ihakiqevemla nani.”

⁷Nono iju alokeu lono O AMPEU; naghuto kumto toi nono isusho pesu qhike. Ikemu nono ilauno ogi kusuluve aye niye musave.

⁸O AMPEU, ino olau ighamukue, ikuphu tsupeniye ino ishi oqhuini jue:

⁹“Ino thivekeu lono noye kiu kighi shelu nani kya? Ino akumolo ilovekeuno kiu ala shiluni kya? Kithimiye osheqhelu nani kesha? Tino amikucho ghili lhelukepu kesha?

¹⁰Initsulo, AMPEU, eno ikimiyekutu tsulo! O AMPEU, ikuphutsulo!”

¹¹Nono imloksa pesu alokivishi ilhekeu shivetsue; nono imlo ghime xaqhivetsu puzu alokivi pesu ipu-uke.

¹²Ikehu niye inaqhoimo nani, niye oshe alepheni. O AMPEU, noye iLhou, niye alhoku pujulo oshikimthi tsuni.