Read Sumi Naga LESHELE 31 Bible Online

LESHELE 31 - Sumi Naga bible

LESHELE 31

¹[33] O AMPEU, opelo isusholupe nike ino phucheni, khilemu ishikujovepe kevilo. Noye achipiu Lhou ke ixaphelulo!

²Itsa initsulo eno ixalulo! Nono isushokulupu tuqu lakhi shilo, ixaphe kulupushi nono aliwo kumto shilo.

³Noye ino ijehkepu tuqu eno isusholukepu liwoke, nono piqhi puake toi ila piye eno isachelo.

⁴Ighenguno alichhe shipuakeu lono ni ikhipheluvelo kughengu ino ijehkulupuye noke.

⁵Oulo ighungu kulhoqhi ani, nono ixapheluve nani, O AMPEU, noye pukhukulupu Lhou ke.

⁶Noye kichile Lhou julho mllakemi mithi cheni, ikemu niye AMPEU pulu cheni.

⁷Owu iqemokeu kikimiye ghenguno ino amlo kiqishi alovi acheni. Ino akijiksa shi akeu nono ithuluvae, ino shiluksa shiakeu nono ithi ani.

⁸Ikehu ighumi ulo nono iphesu tsumoe, Ino khilawuni keno nono ipelo wulupeke.

⁹Ikimiyekutu tsulo, O AMPEU, kughengu niye akijiksa shi ani; ikuqa-kumlo lono inhebo khoivae, ingulho eno iphimpi ghi xexuyivae.

¹⁰Amlo ghime lono ikuxu hauvae, eno amlo ghuju lono niye alho ikhoveni cheni. Shiluksa launo niye qei-nayivae, eno ighi-anhu ghi qeivae.

¹¹Niye ighumi eno akhotono ikisughu mino shishe ijukunatha kepu shi auvae, Alaghilo ni ithulukemiqono kohasu pove ani.

¹²Niye kithimi lakhi toi kumtsuno ikumsumave ani; ali kughupo peveke toivae.

¹³Kutomono chhu-chhushi kuptsakeu ino chilu ani, Aqha kumtsulo akuighupushi ani, Panonguno ishou akumou shiniye kuchughu ani, ikuxu luve tsuniye kumqu ani.

¹⁴Ikemu ino opukhu ani, O AMPEU, Noye iLhou ke,

¹⁵Ido-ghulokiye o-ulo ani, ighumi eno ishikighime kemi ulono ixaphelulo.

¹⁶Oqeu lau ogi jupuwotsulo, Owu iqemokeu kikimiye lono ixalulo.

¹⁷O AMPEU, ino ovilo khuanike, ipelo kujovepe kevilo. Alhoksami shikujove tsulo, panongu pelo kiumu pimlano kithighalo iqivepelo.

¹⁸Khunoqono aqhekuza eno jukunatha keu lono amikuchomi phimoghi picheni keno pano kimki kichi ghasuve tsulo.

¹⁹Osumsa chekemi ghenguno thime kivi nono kikepuakeu huye kiutoi akumzapu kya? Opelo susholupekemi ghenguye nono akivipu shitsukeu timiqo gizulo ithulupe cheni.

²⁰Timino pithiveniye kumqu akeu lono nono akivishi panoqo kusuluve cheni, aghumino axishi keu lono okicheqho kivilo panoqo kusuluve cheni.

²¹AMPEU sheqhe kumghatsulo! kughengu aghumino ikhasuluveno iyiveniye ake lono iqemokeu kikimiye hu akumzapu shi ipiyetsu.

²²Niye musa kelauno ishi kumsuve, “Nono ozulono putou ihapupovae.” Ikemu ikuphutsu peniye ino ighamuku qhuiniju kelo pano ikighini chilutsuke.

²³AMPEU qhuivulo, nongu paghokulumiqo. AMPEU no amikuchomi khepesu acheni, ikemu aqhekuzamiye panono ithulu kuzupu qhemi shi ghime qhi cheni.

²⁴AMPEU laju chekemiqo, akumtoshilo eno nongu mlo mutotoilulo.