Read Sumi Naga LESHELE 33 Bible Online

LESHELE 33 - Sumi Naga bible

LESHELE 33

¹O nongu amikuchomiqo, AMPEU no kiu shivetsua keno tipaulo alokivi launo ighamukulo; nongu pa ghokulumi kumtsu pa sheqhelo.

²Aheo pesu AMPEU lau shikimthikeu tsulo, akighilebo pesu pa shipililo.

³Ale kithe lakhi phe pa shipililo, shitsashi akighilebo kuighalo eno alokivi ghugha shilo.

⁴AMPEU tsaye kuchouke eno pa kumla kumtsu pukhukulupuke.

⁵AMPEU no amikucho eno achipiu kupu kimiye cheni; pawu iqemo keu kikimiyeno ayeghiqha chhitoi ani.

⁶AMPEU tsano kungugha lhoke, aqhi, tsukinhe eno ayepuqoye pa tuthu kisheno lhoke.

⁷Azughi kumtsu pano a-a lakhilo hekutsu; azughi kuthoye pano pekutsu pe qhive.

⁸Ayeghiqha kumtsuno AMPEU sumsalo! Ayeghilo akemi kumtsuno pa gihulo!

⁹Pa tsa lono ayeghiqha lhopheve; pano ahza tsukeulo thwokha ipeghive.

¹⁰Ashiayehqono kughu puakeu AMPEU no adou shivetsu; panonguno kughupe akeu pano hexavetsu.

¹¹Ikemu AMPEU kukughu qoye alhokupuju ache nani; Pa kimijiye lhokta kutolo anani.

¹²Khuno shiyehno AMPEU pesu pano Lhou shini keno tipano lokivipue; Pano khunoqomi kishe pesu pawu timi shiluveni keno tipano Lokivipue!

¹³AMPEU no kungugha lono jupiqi timi lhoxu kumtsu ithulu ani.

¹⁴Pano khile ayehpeani keno tileno ayeghilo xuakemi kumtsu shou jupiqi ani.

¹⁵Panoqo kukumsu shitsukeuye pake, panonguno shikeu kumtsu pano ithi ani.

¹⁶Akukau lakhiye pawu ghushimi kuka kumtono aghu tolu chenike kumoe; Aghutomi lakhiye pa kumtono aghu tolu chenike kumoe.

¹⁷Aghulo peithakeu khurshi namu aghu tokulupulo avehu kuhae; tipaqo kumto kuloghi pimu xamlae.

¹⁸AMPEU ghokulumi khunono pawu iqemokeu kikimiye pukhu cheni keno tipaqo pano jukuto acheni.

¹⁹Pano akithi lono panoqo xalu cheni, puqumiyeke ghulokilo pano panoqo puxulu cheni.

²⁰Ninguno AMPEU lau lajuqhiyi acheni; Pano nisushokuluu eno nikukuphuu.

²¹Ninguye pa ghenguno alovi acheni; paje kimthe ninguno pukhu acheni.

²²Owu iqemokeu kikimiye nigholo achepelo, O AMPEU, oshou ninguno lajube achenike!