Read Sumi Naga LESHELE 34 Bible Online

LESHELE 34 - Sumi Naga bible

LESHELE 34

¹[35] Niye pulhapuju AMPEU shikimthini; Niye pa sheqhekeulo khilemu taveni chemoe.

²Pano kiu shitsukeno tipaulo ino pa sheqheni; Ghimeqhi pesu akemi kumtsu pelo hi chilu no amlo qipeni!

³AMPEU ye kiutoi kijekela igholono pikulha tsulo; ningu kumtsa paje sheni nolo!

⁴Ino AMPEU lau inikhu eno pano ikighini khochiletsu; Ikumsa kumtsu launo pano ikuqhopheke.

⁵Ghimeqhi akemino pa lau jupuwo eno amlo qilue; panonguye khilemu alo muchovemo nani.

⁶Akukuphu kuhakemino paku ighi eno pano khochiletsu; shiluksa kumtsu launo pano panoqo xalue.

⁷AMPEU wu kungumino pa gholu chekemi khe acheni eno akui ghupu launo panoqo xaphelu cheni.

⁸AMPEU ye kiutoi akivi keno olikhi nono julo; khunono pa ijehluni keno pano lokivipue!

⁹Nongu pawu timiqo; AMPEU sumsalo, khunono pa gholu nikeno panono avehupu shiakeu kumtsu aghive cheni.

¹⁰Abongushu ghi achuqupu phumlano muzuthive cheni, ikemu khunono AMPEU gholuni keno thime kivi kiumu athokha shive chemoe.

¹¹Ighilo, lhothemi ikusamiqo eno itsa inilo, AMPEU gihupe nikeu ino nongu shika nike.

¹²Khunono akuxu lokughuno shi xuni shi cheni kya? noye axukushu eno alokivi lunishi cheni kesha?

¹³Tishiaye alhoksa eno akimki pinikeu lono suchileluvelo.

¹⁴Alhoksa launo tsughuvelo eno akivi mlalo; omlo kuchopu pesu aloino keu pukaputsa phulo.

¹⁵AMPEU no amikuchomi jukuto acheni eno pa ghugha initsu cheni;

¹⁶Ikemu paye alhoksa kumlami mujo chile cheni, tighenguno panonguno thive kethiuye timino pai panoqo kumsumave cheni.

¹⁷Amikuchomino AMPEU kucheni eno pano initsu cheni; panongu shiluksa lono pano panoqo xapheluve cheni.

¹⁸AMPEU ye amlo ghujumi kupunukhoi ani; Lajupu puhave kemi pano xalu cheni;

¹⁹Timi kivimiye shiluksa kutomo lono aghime shicheni, ikemu AMPEU no tipaqo kumtsu launo pa xaphelu cheni;

²⁰AMPEU no pa saghi kumtsu pukhape puani; pa saghi lakhimu kubovemoe.

²¹Alhoksano kixikilami pithive nani; amikuchomi mithicheke miye kileqhive nani.

²²AMPEU no pawu timi xalu cheni; khunoqono pawu sukusho qholo ighinikeno kileqhi vemo nani.