Read Sumi Naga LESHELE 35 Bible Online

LESHELE 35 - Sumi Naga bible

LESHELE 35

¹[36] Imujochile kemiqo mujochilelo, O AMPEU; eno isasu kichighi kemi sasu kichighilo!

²Ozuto ngo oghunanu pepuno ikuphunike ithughilo.

³Ihachekemi shou ozuta ongu pukutsulo! nono ixaphelu nani kepi ivilo pitsulo.

⁴Ipithiveniye pukaputsa chekemi pelo haqhivetsuno kujove pelo! Ishou kuchughupe akemi pelo tsughuchile wovepe eno kubangve pelo!

⁵AMPEU wu kungumino panongu hakelo amlhuno am-u fupewuveke toive pelo!

⁶AMPEU wu kungumino panoqo ghadakelo panongu laghiye zumoyi eno nekipheve pelo!

⁷Kutsazu lono panonguno alichhe shipe ikhe eno imeluveniye aqoh thonhei chhupe qhike.

⁸Ikemu panonguno mtha aphi lono kutsakungo keuno panoqo shou ighive nani; Pano likhi pano lichhe lono kitimeluve nani eno panowu kutsakungo keulo ikiqi ilove nani!

⁹Tileno AMPEU gholo ingulhono alokivishi nani, pano xaphelukeulo amlo kiqi shi nani.

¹⁰Imlo kuchopu pesu AMPEU vilo pini: “O AMPEU, otoikeu khumu kuhae, nono akumtomi launo miqe mileikemi xapheluke, mukamihi kemi launo kumlhomi xapheluke.”

¹¹Xesuxenimino ishou akumo akukuhau pipuku, eno ino mthamithe keu kumla lhoksa pesu ingukuke,

¹²Ino akivi shikeu zuqhulo panonguno alhoksa pesu itsuchile, niye amlo-hauveno auvae.

¹³Ikemu panonguno kusukini shive kelo niye akuqa-kumlo phimini pepue; Ino kumvuno ilikhi ighimeve cheke; Ino panongu ghenguno igi pishiqhope inikhuke ikemu ikighini ilau ide ighive.

¹⁴Ikusami momu ithikuzuu ghenguno inikhu akeshi ino akighini shitsue; Aza ghenguno qa-mlo keshi ino iqho iqi, eno pishe pesu qa-mloke.

¹⁵Ikemu ino kupxalu kelo panonguno isuhope ijunuqhi, panongu kuho kumqopeno ino mthakemi kintave kemi thotsu tamono ithaigha.

¹⁶Panonguno xesuxeni shi alau alau ahu tsughu ikichie.

¹⁷O AMPEU noye khitotohi juke likhi ju ani kya? Panoqono ishipusa akeu lono xaphelulo. Abongushu hipaqo launo ikuxu xalutsulo!

¹⁸Tishiaye owu timiqo hoho lono ino oshikimthi tsu nani; aqokitikhi zulono ino osheqhe nani.

¹⁹Hu kimkimi, ighumiqo pelo ino tomovekeulo amlo alovipe kevilo. Kutsazu lono imithichekemi qo pelo imlo ghimelo anhekutsu pekevilo.

²⁰Panonguye shompami gholouno putsakile chemoe, ikemu iqu ghayikemi shou panonguno akimki jeli kumtsu iqiphe acheni.

²¹Panongu baxa mukupe ishou ishi pi, “Nono kiu shipuani keno ninguno ithuluvae!”

²²Ikemu AMPEU, nono hipau ithulu ani ikehu inaqhoive kevilo; O AMPEU, ilauno putosuu auvekevilo.

²³Olikhi ohaputhulo O AMPEU, isusholulo; ithulo iLhou eno ighenguno pitsulo.

²⁴O AMPEU, iLhou, noye amikucho keghenguno niye kiumu shipuamo kepi pitsulo; ighumi pelo ijupesu alokivishi apekevilo.

²⁵Pano likhi pano vilo ishi pipekevilo, “Mughai! nigho-apulou hutoi pa meqhiluvae! Nimlo ghakiqipu shiluvae!”

²⁶Ino kusakusho sholu akelo alokivi shikemi shikukujove eno kubang ve pelo, inguno akiviu kepi ajepipi chekemiqo pelo kujomza eno gihumza kepu shive pelo.

²⁷Khunoqono niye akipimi kuha kepi xathatsu penishi cheni keno alokivi eno amlo kiqishi pelo, eno tamono ishi pilo, “AMPEU ye kijeke! pa huthucheke mino akivishi aghilukeulo paye alovi cheni.”

²⁸Tileno imilino amikucho pikulha tsu nani eno atsala kupuju ino osheqhe nani.