Read Sumi Naga LESHELE 37 Bible Online

LESHELE 37 - Sumi Naga bible

LESHELE 37

¹[38] Kixikilami ghenguno omlo kutakihi akevilo, akumou mlakemi jupesu anheshu kevilo.

²Atsaneghu thizumyive ketoi panonguye pai hauve nani, eno atsuni ighuyive ketoi panonguye thive nani.

³AMPEU lau pukhukeu alo eno akivi mlalo; tishianguno ayeghilo xulu nani eno sushokulu anani.

⁴AMPEU launo olokivi phululo eno omlolo pulo phuakeu pano otsu nanike.

⁵Okuxu AMPEU lau pichebe tsuvelo; pa pukhulo eno pano okuphulu nani.

⁶Noye amikucho kepi pano akuvu toi sughitsu nani, pano achipiu shipuvu pe puchomugho toivetsu nani.

⁷AMPEU pelo shitsupe nike kheakulu shi pa ngokhelo; Alikhi ashelo heshelu momu alhoksa kukughulo toluchekemi jupesu omlo kutakihi kevilo.

⁸Amlo kighide eno aloghu kighide tavelo; Olikhi omlo kutakihi kevilo, tiye alhoksa lo likhi sawuve chenike.

⁹Khunono AMPEU pukhu cheni keno tipanoye aki alu pighiluve cheni, kughengu kixikilamiye hapheve nani.

¹⁰Ado kitila apuzu kixikilamiye hauve nani, nono tsaqutsaleyi pa phuju puhave nani.

¹¹Aqhokighemino aki alu pighilu nani eno kinikulu ngo iqu-ghayikeu kuxulo alokivi shi nani.

¹²Kixikilamino amikuchomi shou kuchughu cheni, eno anhe thi xukide pesu pa jumithi cheni.

¹³Ikemu AMPEU no kixikilami junu cheni, kughengu panongu tsala wovechekeu AMPEU no ithulu ani.

¹⁴Kixikilamino kumlhomi ngo aquaghami pithiveniye, eno achipiu shichekemi ghiqhiniye pano azutakihi sujo cheni eno asuzu susu cheni;

¹⁵ikemu pano ghushi-zutano pano pithive nani, eno pano suzuye hechhepinive nani.

¹⁶Amikuchomino kitila pighi akeuno kixikilami kumtsuno kinikulu shi akeu nguno akiviuke;

¹⁷kughengu AMPEU no kixikilami kuka kumto suwuvetsu nani, ikemu AMPEU no amikuchomi shokhalu cheni.

¹⁸Tukutiye kuhakemi kuxu tsala AMPEU no ithi acheni, eno pano mheghiye pulhapuju ache nani;

¹⁹Alhoksa tsala ighikelo panoye shiluksashi kujomzamo nani; puqumiyeke tsalalo panoye kughokumo nani.

²⁰Ikemu kixikilamiye thive nani; AMPEU ghumiye aghalo xamunu toi hauve nani; panonguye amichhi toi hauve cheni.

²¹Kixikilamiye nalu puzu tsuchile chemoe, ikemu kivimiye michhimono tsu cheni.

²²AMPEU no kumghatsu kemino aki alu pighiluve nani, ikemu pano ghushovekemiye hapheve nani.

²³AMPEU no timi pelo khipala pulakepu keno kichetsu cheni eno pa pulou shikemi susho cheni;

²⁴Panonguno veqhive pinamu panonguye iluqi pesu auve chemoe, kughengu AMPEU no sunheputhuve cheni.

²⁵Niye lhothemi shi xucheno itehiye kitemi shivae, ikemu AMPEU no timi kivimi pheve keu khilemu ithumla aphike, momu panuliqoye achuqupu khuchu cheghikeu ithumla aphie.

²⁶Paye alhokuthu kumsano tsuaghi cheni eno kutami punatsu cheni, eno pa tianuliye kumghapu shilu cheni.

²⁷Alhoksa launo xaideghivelo eno akivi mlalo, eno notianuliye pulhapuju ayeghilo xulu nanike;

²⁸Kughengu AMPEU ye achipiu kimiye cheni eno pawu kuchomi pheve chemoe. Pano panoqo pulhapuju susho cheni, ikemu kixikilami laghiye hapheve nani.

²⁹Amikuchomino aki-alu pighiluve nani eno tipaulo pulhapuju xu ache nani.

³⁰Timi kivimi kichilo alokutsu piqhi cheni, eno paye achipiu piqhi cheni.

³¹Pa Lhou yezah pa mlolo pelu cheni, eno tipau lono ighove chemoe.

³²Kixikilamino kivimi miqe khea puzu pa pithive niye pukaputsa cheni;

³³Ikemu AMPEU ye pa ghumi kukalo pa phesuvemo nani, momu pa shou atsa kugha akelo pa pevekeu shivepemo nani.

³⁴AMPEU lau kheakulu shilo eno pa la zusu wulo; eno pano opelo aki alu pighilu penike oxaqhe nani.

³⁵Ghuthu lakhi kixikilami lakhi aka aghashi xukemi ino ithulu pe puani; eno Libanon lo kedar subo toi kutami ghusupe ache;

³⁶ikemu hithiu ino vechesu wuchekelo paye tile kuhave aghi; ino pa phuju ikemu phumlave.

³⁷Timi kivimi jupe pualo, amikuchomi jukuto kughoilo; iqughaikemiye atianuli achenike,

³⁸ikemu axinemiye qhoi kutsapinyive cheni, eno pano tianuliye jopuhave cheni.

³⁹AMPEU no amikuchomi xalu cheni eno shiluksa ghulokilo panoqo susho cheni.

⁴⁰AMPEU no panoqo kuphu eno xaphelu cheni, pano kixikilami launo panoqo xalu cheni, kughengu pa pelo susholupeniye panonguno pukhuke.