Read Sumi Naga LESHELE 38 Bible Online

LESHELE 38 - Sumi Naga bible

LESHELE 38

¹[39] O AMPEU, omlokighidelo ighimeqhi kevilo!

²Oleghu pesu nono ighuzavae; o-uno ihekuluqhivae.

³Omlo kighide ghenguno ishi-aji ngosumlavae ixineqo ghenguno iphi kuchopu akusu auvae.

⁴Ixineno iyimve puzu niye putsu qhiveni cheae; ape kimshi toi ighenguno mishilo kutu ani.

⁵Ighuzu-nikha ghenguno ipiyi huye tsu-muna shushuyi ani.

⁶Niye pishepesu anie, niye hedapesu auvae; Atsala kupuju ino qa-mlo ani.

⁷Muqhomuza sukeuno ipitiqhi ani eno ishi-aji kumtsulo akithi kumlho shi ani.

⁸Niye shishe qeivae eno hedapesu auvae; imlo kusa shivae eno akusu launo igha su ani.

⁹O AMPEU, ino shitsu penishi akeu kumtsu nono ithi ani ighime qoye ozulono kusulu amoe.

¹⁰Imloye kuku shi chishi ani, ikumtoye chevae, eno inhethilo vuqai ithulu chekeu hu hauvae.

¹¹Iwu shompami eno ikusamino ipiyi ghenguno ipunu mono putou auvae; ibolomi thotsu ikupunu mono putou ngove ani.

¹²Ipithiveniye pukaputsa chekemi no ighenguno alichhe shipe qhi, ighuzaniye shichekemino ishipusa veniye ikichi ani; eno atsala kupuju ishou pishikiqhi kuchughupe ani.

¹³Niye akini kughupomi toi chilu chemoe, atsa pimlakemi toivae eno kuptsamlae.

¹⁴Iye, niye timi tsa chimlakemino khochilemoke toivae, totoikemi kichiloye alomi pikeu kuhae.

¹⁵Ikemu O AMPEU, niye opukhupe anie; eno AMPEU iLhou, nono ikhochile nani.

¹⁶Ighumi pelo ighime jupe amlo kiqishi pekevilo; panoqo pelo ino veqhivekeulo qheza pekevilo!

¹⁷Niye iluqiveniye kutovae, niye sakutu keuno tamono anie.

¹⁸Ino ixine piphe ani, ixineno ipelo a-a shimlano anipeke.

¹⁹Kutsazuno ighumi shi auvekeqoye vithai mtotoi ani; eno akumou lono imithikemi kutomo shivae;

²⁰Ino achipiu shiniye pukaputsake ghenguno akivi zuqhulo alhoksa tsuchileche kemino ighumi shiani.

²¹Ipheve kevilo, O AMPEU; iLhou, ilauno putosuve kevilo!

²²Ikuphu kepushi mtazu ighilo, O AMPEU, ixakuluu!