Read Sumi Naga LESHELE 40 Bible Online

LESHELE 40 - Sumi Naga bible

LESHELE 40

¹[41] Ino kheakulushi AMPEU kukuphu khe ani; Pano ilau kughopuwono ighugha chilutsu cheni.

²Pano akuighupu kuthoku lono isunhepheluve, anibano melu veniye akeu lono. Pano ikughape atuqu shou qhi eno inepa mutotoi shitsue.

³Pano ale kithe phenikeu ikutsupiye niLhou sheqhe nikeu le. Timi kutomono ti ithulu puzu ighuve eno AMPEU lau pukhube keu shiwuve cheni.

⁴Khunono AMPEU pukhubepe cheni keno tipano kumghae, khunono ajulho lau idewomoni momu kichileu ghahwuqo papesu ala kumo la wumoni keno tipano kumghae!

⁵O AMPEU iLhou, okumzapu kumla eno okukumsu nilau tsukeu ghili khunomu pikha mlae. Osasu kimghi akepu khumu kuhae. Ino tipaqo pikulha eno asheshu anamu tiye kihikhaluni chemoe.

⁶Aghakishi eno agho pesu otsukeu noye lunishimoe, Lhoxu akuchopu pitipesu omlakeu momu axine pevelunike aghashikeu noye khu moe. Ikemu ogholupenike chilukepu kini itsuke,

⁷Ino ishi khochile, “Julo, likuzu kakulo ighili yepepua keu kiqi lono ighi ani.

⁸Ogho opulou shinikeuno izukuvuke, O iLhou! Oyezahye imlolo qhi chenike,”

⁹Owu timiqo hoholo nono ixalukeu tsakivi ino pivae, nono ithianike, niye pimono imtsu lakhape amlake, O AMPEU.

¹⁰Niye nono kuphuno xalukeu sutsa imlolo likhi kusu pesu qhimoe, Owu iqemokeu mikucho ngo okukuphu ino pulhapuju lhe cheni; Owu timi hoholo owu iqemokeu kikimiye eno owu ithamokeu mikucho kusu pesu inaqhoive chemoe.

¹¹O AMPEU, noye okukupu ilauno suchileluve kevilo, Owu iqemokeu kikimiye eno itha mokeu mikucho pelo ipuxupe qhilo.

¹²Akupunano phikhamla kepushi isuhope ani; Ixineno ihawo itsuquluvae eno niye kiumu ithumlavae; panoqoye ikutsusa nguno akichiu shiani eno imlo hauvae.

¹³Ixalulo, O AMPEU, itehino ikuphulo!

¹⁴Khunono ipithiveniye pukaputsa ani keno tipaqo shikukujove eno kubangve tsulo. Khunono ino shilusave keulo alovi akhani keno tipaqo hachilevetsu eno kujomzaqhiyive pelo.

¹⁵Khunono ithaigha chenikeno panoqoye akukujono thibuyive pelo.

¹⁶Ikemu ophusu olau ighikemi pelo alokivishi alovilu pelo. Khunono nono xalukeulo oshikimthi cheni keno tipaqo pelo pulhapuju “AMPEU ye kiutoi kije kela” ipi pipelo!

¹⁷Niye tomochhimo eno kumlhomike, ikemu AMPEU no ikumsulu acheni. Nono ixakuluu eno iLhouke, O AMPEU mtazu ikuphukepu shilo!