Read Sumi Naga LESHELE 44 Bible Online

LESHELE 44 - Sumi Naga bible

LESHELE 44

¹[44] Nilikhi nikinino chiluvae, O Alhou, eno nipu asuqono nivilo pivae, Panongu ghulokilo nono akumzapu kumla shikeu hu:

²No ampino ashiayeh kutami haleve puzu panoqo yeghilo owu timiqo sawo suke; Nono ashiayeh kutami ghimeqhi ikemu owu timiqo pelo ililayi xulupeke.

³Owu timiqoye pano ghunanu pesu ayeghi hu leluke kumoe; momu pano kumto pesu toluke kumoe; ikemu okuka, okumto eno nono panoqo gholo akeu lonoke; tiye panoqo lau nono okikimiye piyekehue.

⁴Nono ikukau eno iLhou ke nono Jakob laghami ghenguno tokulupu tsuke,

⁵okuka vechewo ninguno nighumi haqhiluke, oje lono ni leighikemi nedaqhiluke.

⁶Niye isuzu shou pukhu chemoe, momu izutakihi ye ixaluni chemoe;

⁷Ikemu nono nighumi launo nixaluke eno ni thaigha chekemi shikukujove tsuke.

⁸Alhou gholono ninguye pulhapuju akijivilei, eno ninguno alhokupujulo oje shikimthi che nani.

⁹Ikemu itehiye nono ni pevae eno nipelo tomlaveapeke; eno noye niwu ghushimi sasu chewumovae.

¹⁰Nono ni pelo nighumi launo pove anipe, eno ni nhemghaye panonguno luvepeke.

¹¹Nono kutami pelo bheri hutoi ningu ghiqhivepeke, nono inami yeghilo ni hapiye pighiveke.

¹²Nono olikhi owu timiqo ame kimkhe lono jeveke, eno owu timiqoye ame kuhakeshi kumsuke.

¹³Nono ni sumxape akeqo pelo ni jukunathapeke, eno panonguno ni thaigha eno ni junuke.

¹⁴Nono ashiayeh kutami gholo ni pelo aphikumqhupu shivepeke; panonguno akutsu kungu-ghi ni jukunathake.

¹⁵Atsala kupujulo kujomzakepuno izulo anie, eno ighumi ngo imithi chekemiqono ijunishimo keu eno iphimokeu chilu kehu akuku jono igi nhaluvae.

¹⁷Ninguye oqhive mphi momu owu puloshoqhi hexa mphi keghi hipaqo kumtsu ni shou ikughi anipeke.

¹⁸Ninguye nimlo athiu xachile idewo mphi momu nono piqhi keu yezah ghobide puamphike.

¹⁹Ikeghi nono ni hephopinyi pesu tughashi gholo qhike; nono akuzukutholo ni kughape qhipuaveke.

²⁰Tsala ninguno niLhou mllamove aghiaye momu inami lhou lau khuini puaghiaye.

²¹Alhou, noye tipau phuluve nanike kughengu noye nimlolo kua tuqho tughou kumtsu ithi ani.

²²Ikemu oghenguno atsala kupujulo nighiqhivepe acheni, eno bheri ghiqhikeu toi nipimhe achenipeke.

²³O AMPEU, ithughilo, noye kushiye zu ani kya? Oxuide julo! pulhapuju ni peve kevilo!

²⁴Noye kushiye nilauno itshu ani kya? Nighime eno niwu shiluksa kumsumave kevilo!

²⁵Ayeghilo ni qoda pesu anie; niphimpi kumtsu ayeghi mukhulo meda pesu anie.

²⁶Ithu ni kuphutsulo! Nono tamono kimiye cheku lono ni xaphelulo!