Read Sumi Naga LESHELE 45 Bible Online

LESHELE 45 - Sumi Naga bible

LESHELE 45

¹[45] Akukau ghenguno ino ale hipau iqikelo atsato jukighilepuno ikukumsu chhie. Akiye kivimi lakhi ulo akiyepu ake toi imliye alejo kutope ani.

²Timi dolo noye ajukiviu ke, atsapilo noye aghileshi pilukemi, Alhou no pulhapuju okumghatsu cheni.

³Ozutakihi oyikulo chhe pululo, O Akughushuu; noye ajekipi eno akiqhe akighicheuke.

⁴Kuchou eno achipiu susholu nike ghenguno akiqhe akighicheu lono tokuluulo ikulo! Okumtono opelo tokulu kije shilupelo!

⁵Opijiye tsugha minheike, tipauno oghumi mlo vexutsuke; ashiayeh kutamino opukhu philo itsaqike.

⁶Alhou no otsukeu yehkipeqhaye pulhapujulo ache nani. Nono achipiu xakutha pesu owu timiqo shou ayehpeke;

⁷Noye achipiu kimiye eno alhoksapuye mithike. Tighenguno Alhou, oLhou no okisheluke eno alokivi pesu kukami kutami nguno alau oshou betsuke;

⁸Ophimini kumtsu mur-xo ngo aloi xono tsungqui anike. Akuhahu pesu ananu shikeu akighikilo alejomino olopivitsuke.

⁹O akukau nipu shiniye akeu kulaliu! okuka lakhu ajeu akukaliuno jukighilepu shuna chila pepusu puthughoke.

¹⁰O akukau nipu shiniye akeu kulaliu! ino kiu pini keno inilo, q1 Owu timi eno nokibolomi kumsuma velo.

¹¹Ojukivino akukauye oluni shivepe nani; paye ompeu shini ake, pa ghokulu shilo.

¹²Tur no-ghamino agho pesu olau ighi nani, kinimino akini jeli pesu ozukuvupu shitsuniye pukaputsa nani.

¹³Akukaliuye shuna pesu ghokunakeu phimini pepusu akighikilo ani.

¹⁴Liye aphimini jukighilepu jeli pepusu ilimi muqono li thiuno botha pesu akukau lau sawu, ilimiqo ghi akukau lau sawo tsuke.

¹⁵Alokivi eno alokughunoshi panonguno ighi puzu akukau kuka kilo iloe.

¹⁶No, ikukau, noye anu kutomo shi nani, eno opuasu thelilo kukami shilu nani, eno ayeghiqha shou nono panongu pelo ayehpemi shipe nani.

¹⁷Ilejono ojekipi pushi alhokupujulo pekishewope nani; eno timi kumtsuno oje shipili acheuve nani.