Read Sumi Naga LESHELE 49 Bible Online

LESHELE 49 - Sumi Naga bible

LESHELE 49

¹[49] Timi kumtsuno hi inilo! Ayeghiqhalo akemi kumtsuno chilulo,

²Kijemi kitilami ghi, kumlhomi kinimi ghi!

³Ikukumsuye thonhei tsaqutsa leyikeu; niye alokutsu tsa pinike.

⁴Ino aholetsa kumsu kuthoju, akighilebo pheghi aholetsa kiqi pini cheni.

⁵Shiluksa ghulokilo niye musamoe ighumiqono isuhuluve kelo,

⁶alhokusamino kinikulu pukhu eno pano kuakini nibonilei akeu jupe qhezake.

⁷Timiye khilemu pa likhi pa qhuchile mlae, momu pa kuxuye kiu me keno pesu Alhou tsumlae;

⁸kughengu timi kuxu meye ighono ame kutomoke eno kiu kiu tsunamu tipauno

⁹Pa pelo pulhapuju xuauvepe kepu qhemi kuhae, momu akumokilo ilovepemo nikeu qhemi kuhae.

¹⁰Kumtsuno ithulu anike alokutsumi ghithive cheni, mbomzumi ghi titoive cheni, kumtsuno panowu kua-kini kutami qhivetsu cheni.

¹¹Pano kumokino alhokupujulo panoki ke; panonguno pano yeghi ani kepi ghuthu lakhiloye pi ache namu panoye alhokuthu akumokilo acheuve nani.

¹²Timi lakhiye kije shicheke ghenguno tino akithi launo pa xamlae; tishimu paghi lhoxu kutau toi thive nani.

¹³Khunoqono pano likhi pano pukhu cheni keno tipaqoye kiu shive cheni keno julo, panowu kuakini shou amlo kiqishi acheni keno tipano kuxu shekha julo.

¹⁴Bheri toi panonguye thiveni putsa keu, eno Akithino panoqo kheu shiuveni, Kithighalo pano phimpiye pai tsumunauve cheni; akumokino pano ki shi akelo amikuchomino panoqo shou theqhiluve cheni.

¹⁵Ikemu Alhou no ixapheluve nani, pano akithi kuka lono ixaluve nani.

¹⁶Kutamino kinimi shiuveke ghenguno amlo kutakihi kevilo, pawu kuakini alaushi thuwu ikuve pinamu,

¹⁷Pano thivekelo pa gholo tipaqo pesu wuluni chemoe; pa kiniye pa kumokilo pa gholo suwumlake.

¹⁸Pano xuakelo paye alokivi shi acheni kepu kihi aghi namu, pano shilu ani kepi akishe pa tsu aghinamu,

¹⁹Paye akithi lono pa puasuqo gholo wuve nani, tilehiye akuvu khilemu ithulumo ake.

²⁰Timiye pa kuakinino khijejehi shi aghinamu vethakulu kuha ye pa ghi lhoxu kutau toi thive nanike.