Read Sumi Naga LESHELE 50 Bible Online

LESHELE 50 - Sumi Naga bible

LESHELE 50

¹[50] Akughushuu, AMPEU Alhou no kipelauno kulolau kutolo ayeghiqha ku-puzu pike.

²Zion phughi jukivino aghile pu shiakeu Lhou no yepuvu ani.

³NiLhou cheni, inaqhoi keu lono kumoke ami kuyiquno pa zuwu shi pasapaghano pa vehope ani.

⁴Pano pawu timi shou kughathakeu jupeniye kungugha ngo ayeghi pelo thopi shipeniye kuke.

⁵Pano pi, “Khunoqono aghakishi pesu mllano isasu puloshoqhi shipuani keno, ighokulumi iwu timiqo ilau kumqolo.”

⁶Kungughano Alhou ye amikucho kepi asheshu, kughengu pa ampino kughakuthauke!

⁷“Inilo, iwu timiqo, ino pinike, O Israilmi, nono achipishi achemokeu pini: Niye Alhou, nongu Lhou ke.

⁸Nonguno aghashi mllakeu ghenguno niye nongu sakiyi anike kumoe; Nonguno piti pesu mllakeu ghoye pulhapuju izulo acheni.

⁹Tishimu niye noki lono amshitsu avehupu shiamoe, momu notsuaqu gholono anetsu avehupu shiamoe;

¹⁰Aghasalo lhoxu akeqo kumtsu iwuke eno atoghi lo atsu-aqu phikhakumla akeqoye iwuke.

¹¹Yechekeu ghau kumtsu ino ithi ani, eno aluzalo lhoxu chekeu kumtsu iwuke.

¹²‘Ino muzuthi chemothono tsala ino muzuthi aghi pimu niye nongu vilo pinichemoke, kughengu ayeghi eno tipaulo akeu kumtsu iwuke.

¹³Niye amshitsu shi chucheni kesha? momu ane-ji shoni kesha?

¹⁴Shikimthi keu pesu Alhou lau aghashipe mllalo, eno Akughushuu lau piqhivekeu hu kumtsu shilo.

¹⁵Shiluksa ighikelo ivilo pilo, ino nongu xalunike eno nonguno isheqhe nani.’

¹⁶Ikemu alhoksami vilo Alhou no piani, ‘Nonguye kushiniye iyezah phikibe acheni kya? Nonguye kushiniye iwu puloshoqhi ghili picheni kya?

¹⁷Nonguno ipelo nongu shikithepiye pemoe; nonguno iyezah qo leveke.

¹⁸Nonguno kupkami khije ithuluni keno tipaqo sasu shou-pau shiwuveke; eno nonguno kusalhami sasu kuloji wuveke.

¹⁹“Nonguno pulhapuju alhoksa pini keu khelhoe; eno nongu miliye akimiki tsa pini keu khilemu suchilemoe.

²⁰Nonguno nothikuzumi nguku nikeu khelhoe eno aza lakhi nu shiaghimu nonguno phimokile cheni.

²¹Nonguno hi kumtsu shicheni ikemu niye inaqhoi acheni; ikehu nonguno kumsukeuno niye nongu toi kughashi achenike. Ikemu itehi niye nongu sakiyi ani, eno avehu mutsumishei xathape nongu qhitsu ani.

²²“Hi inilo, nongu Alhou phimono achekeqo, tikumoaye ino nongu kutsakhave nani, eno khunomu nongu xamla nani.”

²³“Timi khuno pawu shikimthikeu pesu akumllagho shighi sughinikeno paye igihu anike, eno igholu kemi kumtsu lau ino kuchouno xaluve nani.”