Read Sumi Naga LESHELE 55 Bible Online

LESHELE 55 - Sumi Naga bible

LESHELE 55

¹[55] O Alhou, ikighini initsulo! Ino qhuinju akeu lono inizuve tsu kevilo!

²Ilau ighowo inilo eno ikhochile tsulo; imlokusano niye lhovae.

³Ighumino shikichikeuno niye musa ighu ani, kixikilamino itsadaqhi keno musa ighu anike. Panonguno akupuna itsu eno axuide imthi ani.

⁴Niye musa ighu ani, akithi kuighupuno ishou ikughi ani,

⁵Akumsa ishou ikughi keuno niye khokhoshi ani, eno musa ichi keuno inhaluvae.

⁶Miqhedu toi achishibo puaghi keaye niye yewuveno akulho qhiauveni cheke.

⁷Niye putou yewuveni cheke, eno timi kughunamoke-alo auveni cheke.

⁸Pasapagha eno amlhuno fuda qhikeu launo niye mtazu akighijepu phuwuveni cheke.

⁹O AMPEU! panonguno kuchughu keu hexavetsulo eno panongu tsapi kubangve tsulo. Kughengu aphughilo heqhibuqhikeu eno kusuxakilekeu niye ithulu ani,

¹⁰putho pucho panonguno aphughi sumxape ani, eno kipithikile keu eno akupuna tipaulo ani.

¹¹Kutsakungo keu panongu gholo ani; alaghilaye pishikiqhi eno suxa kuluno chhitoi aphie.

¹²Aghumi lakhino ipiputha aghike aye niye ti puqheluveni cheke; Imjochile akemino ishou qheza aghike aye niye pa launo itshuluveni cheke

¹³Ikemu ikusau, iqhemi, ino ithithai akeu ishou ampino.

¹⁴Ikujo jumghai kuptsakile kuho chekeu eno Achinekilo kumtsa iqhoiqi chekeuno ke.

¹⁵Akithi pelo panongu kughaluve pelo; xuapulaghi kithimi yeghilo iqive pelo! Pano kilo eno pano mlolo lhoksa kugha anike.

¹⁶Ikemu niye Alhou vilo kuphupe nike pini eno pano ixalu nani.

¹⁷Ino putho pucho pa vilo muchho khua nani eno pano isutsa chilu nani.

¹⁸Ino ighumi kutomo sasu aghushi ake lono pano ingulho xaphe suwo lokughuno tsu nani.

¹⁹Lhokta lono ayehpe cheghikeu Lhou no isutsa initsu nani eno panoqo halevetsu nani; kughengu panonguno akuxu pekilimoe eno Alhou sumsamoke.

²⁰Puzuu ikusami shi chekemino pano kusami shou a-u chhopuku, eno pashoqhi hexave anike.

²¹Pa tsapiye akikhe chuqu nguno akumtshauke, ikemu pa mlolo mithi keu ani; pa tsaye teli nguno akumtshauke, ikemu azutakihi toi tsughaminheyike.

²²Omakho pe AMPEU shou pukhubelo eno pano oshikumto nani; paye khilemu amikuchomi pelo tomlave pemo nani.

²³Ikemu O Alhou, nono panoqo pesu aqohkutholo suve nani, ghikiqhimi ngo kimkimiye pano kuxu amtamu xumo nani. Ikemu niuye opukhuni chenike.