Read Sumi Naga LESHELE 57 Bible Online

LESHELE 57 - Sumi Naga bible

LESHELE 57

¹[57] Ikimiye tsulo, O Alhou, ikimiye tsulo, kughengu opelo isusholutsu peniyeke. Ochishibo kicheqholo ino ijehlu nanike, tiye shikupsa pasapagha hechelumoke kutolo.

²Ino Akiqheu Lhou vilo ighamuku kuke; ivehupu kumtsu sughitsu chekeu Lhou vilo.

³Pano kungugha lono khochileno ixalu nani, ineda-qoda chekemiqo pano shikukujo nani. Alhou no pawu iqemokeu kikimiye eno iqemokeu mikucho ilau puwutsu nani!

⁴Abongushu lojilo niye ngolu ani, mihemza timi tsuchuve chekeqo gholo; Panongu huboye apiji ngo angu toike eno panongu miliye azuta kihi kutsugha toike.

⁵Atsutsulo okuka kije piyelo, O Alhou eno ayeghilo ojekipi alupelo.

⁶Ighumino imeluniye inepalo alichhe shipuani, azukuzuno niye ihulo keu shivae. Panonguno ilaghilo aqoh chhupe qhi keulo pano likhi panono tile veqhi ilove.

⁷Imlo ithamphie, O Alhou, Ino alephe osheqheni!

⁸Ithulo, ingulho! Ithulo, ikighilebo eno ilejobo! Ino tsukinhe kudaputhuni.

⁹Ashiayeh kutami gholo ino oshikimthini, O AMPEU, timiqo gholo ino osheqhenike.

¹⁰Owu iqemokeu kikimiyeno kungugha kutolo iku ani, eno owu iqemokeu mikuchono atsutsu dilu ani.

¹¹Atsutsulo okuka kije piyelo, O Alhou, eno ayeghilo ojekipi alupelo.