Read Sumi Naga LESHELE 59 Bible Online

LESHELE 59 - Sumi Naga bible

LESHELE 59

¹[59] Ighumi launo ixaphelo, O iLhou, ishipusaniye kuto akemi launo isusholulo!

²Alhoksa kumlami launo ixaphelulo Ghiqhi heqhi chekemi launo ixalulo!

³Julo! Panonguye ikuxu luvetsuniye imiqe ani; ayikusamino kumqo pesu ishou ighi ani. Hiye ino kiuala axine momu akipimi shiveke ghenguno kumoe, O AMPEU;

⁴Momu ino kuquveke ghenguno panonguye posuwo kutope ngo luveke kumoe.

⁵Ithulo, AMPEU Alhou Akughushuu, ighino ikuphulo; no ampino julo, O Israilmi Lhou! Ithupuzu Alhou kumthami shiayehqo ghimeqhilo; amqu lhoksa muqushi akemiqo khilemu phepuwuve kevilo!

⁶Kijili atsutsu panonguno ideighi cheni, atsuqo toi aphughilo igha eno xususu wucheni.

⁷Panonguno atsa zaleqhi chenike, eno panongu miliye azutakihi toi anike; eno panonguno kumsukeuno khunomu panoqo tsa chimlania ghashi ani.

⁸Ikemu O Alhou, nono panoqo junu acheni; nono aye kumthami shiayeh qo jukunatha cheni.

⁹Nono ikumtoke, ino osheqheni, O Alhou, noye ino ihjehlu chekeu ke.

¹⁰ILhou no ikimiye cheni eno ilau ighi nani, ighumi shou tokulupu iLhou no ipelo ithulupe nani.

¹¹Panoqo ghiqhikevilo, O Alhou, ni timino kumsumave nosake, Okumtono panongu halevetsulo panoqo shou toluvelo, O AMPEU, nisushokuluu.

¹²Panoqo kichilo axine shikeu, panoqo mutsulo pikeu tsa ghenguno pano qhekuza pelo panoqo meluvepelo. Kughengu panonguno miki eno ghusho cheni,

¹³Ologhu kighide lono panoqo kutsa velo; panoqo ithumlave kepushi kutsapinyivelo. Tishianguno Alhou no Israilmi gholo ayehpe anikepi timiqono ithipelo; eno pa yehkipeye ayeghiqha kumtsulo ani kepi ithipelo.

¹⁴Kijili atsutsu ighumino ideighi cheni, atsuqo toi aphughilo igha eno xesusu wucheni.

¹⁵Panonguye atsu toi itsu susu achuqu phucheni eno lukumkhashi ithumla aye igha cheni.

¹⁶Ikemu niye okuka kumto ghili le pheni; inaqhe atsu-tsu owu iqemokeu kikimiye shipili ani cheni. Noye ino su ijehlu chekeuke, shiluksa ghulokilo isushokuluu.

¹⁷O isushokuluu, ino osheqhe shipilini, kughengu Alhou, noye ino su-ijehlu chekeuke, noye ikimiye chekeu Lhou ke.