Read Sumi Naga LESHELE 65 Bible Online

LESHELE 65 - Sumi Naga bible

LESHELE 65

¹[65] Zion lo ninguno osheqhekeuye achipike, O Alhou eno nino olau bekutha shoqhi shi keu pekupulu nani,

²Kughengu nono akighini khochile tsuke. Panoqo xine ghenguno aqha kumtsu lo timino olau ighi nani.

³Ni xineno nilakhaluve kelo nono tipaqo pevetsuke.

⁴Nono timi khuno kishelu keno tipano lokivipue, nono achekeu-a kupunu saghikemi lokivipue. Okilo thime kivi akeu pesu nigha piqilu nani, tiye oki kimthe kukumghake.

⁵Nono tokulu nitsukeu lono nikighini khochile tsuke, eno nixalu niye nono akumzapu kumla shike. Ayeghiqhalo eno azughi kachewo timi akemi kumtsuno opukhu cheni.

⁶Okumto pesu naghutoqo pututa-alo qhike, tiye okuka piye anike.

⁷Nono azughi ghugha ghasu, azutu kucho sutsa ghasu; nono timiqo ghugha ghakuquke.

⁸Nono akumzapu kumla shikeulo ayeghiqhano kutuxoxo ngoke. Inakijili nono mlaqhikeuno alokivipu ghugha sughike.

⁹Nono ayeghi ima keu lono azu piqitsu; Nono ayeghi pelo kinikulu shi aghuma shilupe. Oghokiqoye azuno chhitoi ani, nono timiqo lau athi jeli kutotsuke. Nono hikithipushi shipuani:

¹⁰Alu hokide puakeulo nono kupukunoshi ghuqhitsu, eno azuno tipaqo putsutsuke; Nono ghuqhipe puzu ayeghi vaku mtsha pesu asubo khuni thuwu lupe.

¹¹Nono thime kivi pesu ghilelo kini kulu shilupe! Nono khilekhile wuni keno niboni lekeu acheni.

¹²Atsuni kivi-alo pichepighino chhitoi ani, atoghiye alokivino sumxape ani.

¹³Aluzaye bheriqono nhakha pesu ani; abokhuqoye ashothino chhitoi ani Thwokha kumtsu alokivi launo alephe igha ani.